സിനിമയുടെ ക്ലൈമാക്‍സ് ഇഷ്‌ടമായില്ല, മമ്മൂട്ടി പിന്‍‌മാറി !

കഥകള്‍ കേട്ടുകൊണ്ടേയിരിക്കുന്ന സൂപ്പര്‍താരമാണ് മമ്മൂട്ടി. ഇഷ്ടമാകുന്ന കഥകള്‍ എത്രയും പെട്ടെന്ന് സിനിമയാക്കാന്‍ ആഗ്രഹിക്കും. ഇഷ്ടമാകാത്ത കഥകള്‍ ഇഷ്ടമാകുന്ന വിധത്തിലാക്കിയെടുക്കാനും ശ്രമിക്കും. എന്നാല്‍ ഒരു കഥയോട് അനിഷ്‌ടം തോന്നിയാല്‍, അത് ശരിയാക്കാന്‍ ശ്രമിച്ചിട്ടും ശരിയാകുന്നില്ലെങ്കില്‍ പിന്നെ അതില്‍ നിന്ന് മാറിനില്‍ക്കും. അതാണ് മമ്മൂട്ടിയുടെ രീതി.

ലാല്‍ ജൂനിയര്‍ സംവിധാനം ചെയ്യുന്ന ‘ഡ്രൈവിംഗ് ലൈസന്‍സ്’ എന്ന ചിത്രത്തില്‍ ആദ്യം മമ്മൂട്ടിയായിരുന്നു നായകന്‍. സച്ചിയായിരുന്നു തിരക്കഥ. കഥയുടെ ക്ലൈമാക്‍സിനോട് ചേര്‍ന്ന ഭാഗങ്ങള്‍ മമ്മൂട്ടിക്ക് ഇഷ്ടമായില്ല. അത് അദ്ദേഹം തുറന്നുപറഞ്ഞു. മാത്രമല്ല, നായകതുല്യമായ വേഷത്തില്‍ ലാലും അഭിനയിക്കുന്നുണ്ട്. ആ സമയത്ത് രണ്ട് നായകന്‍‌മാരുള്ള പടത്തില്‍ അഭിനയിക്കാനും മമ്മൂട്ടി താല്‍പ്പര്യപ്പെട്ടില്ല. ഒരുപാട് ചര്‍ച്ചകള്‍ക്ക് ശേഷം മമ്മൂട്ടി ആ പ്രൊജക്ടില്‍ നിന്ന് മാറാനുള്ള തീരുമാനമെടുത്തു.

പിന്നീട് വര്‍ഷങ്ങള്‍ കഴിഞ്ഞാണ് ആ പ്രൊജക്ട് വീണ്ടും സെറ്റാക്കി വരാന്‍ ലാല്‍ ജൂനിയറിന് കഴിഞ്ഞത്. മമ്മൂട്ടിക്ക് പകരം പൃഥ്വിരാജ് അഭിനയിക്കുന്നു. ലാലിന് പകരം സുരാജ് വെഞ്ഞാറമ്മൂടും.

റണ്‍ ബേബി റണ്‍, ചോക്ലേറ്റ്, രാമലീല, സീനിയേഴ്‌സ്, മേക്കപ്പ് മാന്‍, റോബിന്‍‌ഹുഡ് തുടങ്ങിയ ഹിറ്റ് ചിത്രങ്ങളുടെ രചയിതാവാണ് സച്ചി. അനാര്‍ക്കലി എന്ന ഹിറ്റ് ചിത്രം സച്ചി സംവിധാനം ചെയ്തിട്ടുമുണ്ട്. എന്നാല്‍ എത്ര വലിയ എഴുത്തുകാരനാണെങ്കിലും കഥ തനിക്ക് ഇഷ്‌ടമായില്ലെങ്കില്‍ ‘നോ’ പറയാന്‍ മമ്മൂട്ടി ഒരുകാലത്തും മടിച്ചിരുന്നില്ല.