മോഹന്‍ലാലിന്റെ പാന്‍ ഇന്ത്യന്‍ ചിത്രം വൃഷഭ ഉപേക്ഷിച്ചതായി റിപ്പോര്‍ട്ട് !

മോഹന്‍ലാല്‍, ഷനയ കപൂര്‍ എന്നിവരാണ് ചിത്രത്തില്‍ പ്രധാന വേഷങ്ങള്‍ അവതരിപ്പിക്കുന്നത്

മോഹന്‍ലാലിനെ നായകനാക്കി നന്ദ കിഷോര്‍ സംവിധാനം ചെയ്യുന്ന 'വൃഷഭ' ഉപേക്ഷിച്ചതായി റിപ്പോര്‍ട്ട്. നിര്‍മാതാക്കള്‍ സിനിമയില്‍ നിന്ന് പിന്മാറിയതാണ് പ്രൊജക്ട് ഉപേക്ഷിക്കാന്‍ കാരണമെന്ന് റിപ്പോര്‍ട്ടുകളില്‍ പറയുന്നു. പ്രതീക്ഷിച്ചതിലും ചെലവ് കൂടിപ്പോയതാണ് നിര്‍മാതാക്കളില്‍ ചിലരില്‍ ഒഴിയാന്‍ കാരണം. സിനിമ മുന്നോട്ടു കൊണ്ടുപോകാന്‍ കഴിയാത്ത സ്ഥിതിയാണ് ഇപ്പോള്‍ ഉള്ളതെന്നും വൃഷഭയുമായി ബന്ധപ്പെട്ട വൃത്തങ്ങള്‍ റിപ്പോര്‍ട്ട് ചെയ്യുന്നു. 

മോഹന്‍ലാല്‍, ഷനയ കപൂര്‍ എന്നിവരാണ് ചിത്രത്തില്‍ പ്രധാന വേഷങ്ങള്‍ അവതരിപ്പിക്കുന്നത്. ഷനയ ഒഴിഞ്ഞതാണ് ചിത്രം പ്രതിസന്ധിയില്‍ ആകാന്‍ കാരണമെന്നും സ്ഥിരീകരിക്കാത്ത ചില റിപ്പോര്‍ട്ടുകള്‍ പുറത്തുവന്നിരുന്നു. അണിയറ പ്രവര്‍ത്തകര്‍ ആരും സിനിമയുടെ ഭാവിയെ കുറിച്ച് ഇതുവരെ പ്രതികരിച്ചിട്ടില്ല. 

അതേസമയം ആദ്യ ഷെഡ്യൂള്‍ പൂര്‍ത്തിയായ ശേഷമാണ് വൃഷഭയുടെ ചിത്രീകരണം താല്‍ക്കാലികമായി നിര്‍ത്തിവെച്ചിരിക്കുന്നത്. പിന്നീട് ഇതുവരെ പുനരാരംഭിക്കാന്‍ സാധിച്ചിട്ടില്ല. മലയാളം, തെലുങ്ക്, കന്നഡ, തമിഴ് ഭാഷകളില്‍ വൃഷഭ റിലീസിനു എത്തിക്കാനായിരുന്നു തീരുമാനം. ചിത്രത്തിലെ മോഹന്‍ലാലിന്റെ ലുക്കും ഏറെ ശ്രദ്ധിക്കപ്പെട്ടിരുന്നു.