മമ്മൂട്ടിച്ചിത്രത്തില്‍ നയന്‍‌താര നായികയാകുന്നതും വിജയ് സേതുപതി വില്ലനാകുന്നതും ഇപ്പോള്‍ വലിയ ചര്‍ച്ചാവിഷയമാണല്ലോ. ഇപ്പോള്‍ അറിയുന്ന വിവരങ്ങള്‍ അനുസരിച്ച് മലയാളത്തിലെ ഏറ്റവും വലിയ മാസ് ത്രില്ലറിനാണ് അരങ്ങൊരുങ്ങുന്നത്.
ഈ സിനിമയ്ക്ക് വൈശാഖ് ആയിരിക്കും സംവിധാനമെന്നും രഞ്ജിത്തിന്‍റെ തിരക്കഥയിലായിരിക്കും വൈശാഖ് ഈ സിനിമ ഒരുക്കുന്നതെന്നും സൂചനകള്‍ വരുന്നു. വലിയ ഇടവേളയ്ക്ക് ശേഷം രഞ്ജിത് മറ്റൊരു സംവിധായകന് വേണ്ടി തിരക്കഥ എഴുതുകയാണെന്നാണ് റിപ്പോര്‍ട്ടുകള്‍.
മമ്മൂട്ടി - വൈശാഖ് ടീം ഒടുവില്‍ ഒന്നിച്ചത് ‘മധുരരാജ’ എന്ന ബ്രഹ്മാണ്ഡ ചിത്രത്തിന് വേണ്ടിയായിരുന്നു. ആ സിനിമ 100 കോടി ക്ലബില്‍ ഇടം നേടിയതിന് പിന്നാലെയാണ് പുതിയ പ്രൊജക്ടിന്‍റെ റിപ്പോര്‍ട്ടുകള്‍ ലഭിക്കുന്നത്.
സമീപകാലത്ത് സ്വീകരിച്ചിരിക്കുന്ന ശൈലിയില്‍ നിന്ന് മാറി ഒരു പക്കാ മാസ് പടമായി ആയിരിക്കും രഞ്ജിത് ഈ തിരക്കഥയെഴുതുക. വല്യേട്ടന്‍, നരസിംഹം മോഡല്‍ സിനിമയായിരിക്കും ഇതെന്നാണ് വിവരം.
വിജയ് സേതുപതി മലയാളത്തില്‍ അഭിനയിക്കുന്ന രണ്ടാമത്തെ സിനിമയായിരിക്കും ഇത്. തകര്‍പ്പന്‍ വില്ലന്‍ വേഷമാണ് വിജയ് സേതുപതിക്ക് ലഭിക്കുക. പുതിയ നിയമത്തിന് ശേഷം നയന്‍‌താര മമ്മൂട്ടിയുടെ നായികയായി എത്തുന്നു എന്നതും പ്രത്യേകതയാണ്.