ലോകം വേൾഡ് കപ്പ് ലഹരിയിൽ മതിമറന്നിരിക്കുമ്പോൾ പൃഥ്വിരാജ് – പാര്‍വതി കൂട്ടുകെട്ടിൽ ഇറങ്ങുന്ന മൈ സ്‌റ്റോറിയുടെയും ഫിഫ ഫീവർ ടീസർ പുറത്തുവിട്ടിരിക്കുകയാണ്. ചിത്രത്തിന്റെ ഏറെക്കുറെ ഭാഗം ചിത്രീകരിച്ചിരിക്കുന്നത് പോർച്ചുഗലിലാണ്.
നവാഗതനായ റോഷ്‌ണി ദിനകറാണ് ചിത്രത്തിന്റെ സംവിധാനം നിർവ്വഹിച്ചിരിക്കുന്നത്. റൊമാന്റിക് മ്യൂസിക് ഗണത്തില്‍പ്പെടുന്ന ക്യൂട്ട് ലിറ്റില്‍ ലവ് സ്റ്റോറി എന്നാണ് സംവിധായിക ചിത്രത്തെ വിശേഷിപ്പിക്കുന്നത്. 'എന്ന് നിന്റെ മൊയ്‌തീന്' ശേഷം പൃഥ്വിരാജ് – പാര്‍വതി കൂട്ടുകെട്ടിന്റെ അടുത്ത ചിത്രമാണിത്.
ചിത്രം സമകാലിക വിഷയത്തിനും പ്രാധാന്യം നൽകുന്നുണ്ട്. ഇതിന് മുമ്പ് മൈ സ്‌റ്റോറിയിലെ ഗാനം പുറത്തിറങ്ങിയിരുന്നു. എന്നാൽ കസബ സിനിമയുമായി ബന്ധപ്പെട്ട് മമ്മൂട്ടിയെ വിമര്‍ശിച്ചതിനെ തുടർന്ന് യൂട്യൂബിൽ പാട്ടിന് ഡിസ്‌ലൈക്കുകളുടെ പൂരമായിരുന്നു. ഇനി ഈ ടീസർ പ്രേക്ഷകർ എങ്ങനെ ഏറ്റെടുക്കുമെന്ന് കണ്ടുതന്നെ അറിയാം.