'രണ്ടാമൂഴം ഏറ്റെടുത്ത് സംവിധാനം ചെയ്യണം'; പ്രിയദർശനോട് അഭ്യർത്ഥനയുമായി ആരാധകർ

ദാദാസാഹിബ് ഫാൽക്കെ പുരസ്കാരം നേടിയ അമിതാഭ് ബച്ചനെ പ്രശംസിച്ച് പ്രിയദർശൻ കഴിഞ്ഞ ദിവസം ഫേസ്‌ബുക്കിൽ പോസ്റ്റ് ഇട്ടിരുന്നു.

മലയാളിയുടെ പ്രിയ എഴുത്തുകാരൻ എംടിയുടെ രണ്ടാംമൂഴം പ്രിയദർശനൻ സംവിധാനം ചെയ്യണമെന്ന് ആരാധകർ. പ്രിയദർശന്റെ ഔദ്യോഗിക ഫേസ്‌ബുക്ക് പേജിലൂടെയാണ് ആരാധകരുടെ അഭ്യർത്ഥന. ദാദാസാഹിബ് ഫാൽക്കെ പുരസ്കാരം നേടിയ അമിതാഭ് ബച്ചനെ പ്രശംസിച്ച് പ്രിയദർശൻ കഴിഞ്ഞ ദിവസം ഫേസ്‌ബുക്കിൽ പോസ്റ്റ് ഇട്ടിരുന്നു. ഇതിനു താഴെയാണ് ആരാധകർ ആവശ്യമുയർത്തി കമന്റുകൾ ഇട്ടത്. 

പ്രിയദർശൻ സംവിധാനം ചെയ്ത്, ബച്ചൻ അഭിനയിച്ച ഒരു പരസ്യം പങ്കുവെച്ചുകൊണ്ടായിരുന്നു കുറിപ്പ്. 'ദാദാസാഹിബ് ഫാല്‍ക്കെ പുരസ്‌കാരം കരസ്ഥമാക്കിയ അമിതാഭ്ജിക്ക് എല്ലാവിധ ആശംസകളും. നാല്‍പ്പതിലേറെ പരസ്യങ്ങളില്‍ ഞാന്‍ അദ്ദേഹവുമൊത്ത് ജോലി ചെയ്തിട്ടുണ്ട്... അതിലൊന്ന് ഞാനിവിടെ പങ്കുവെക്കുന്നു. എനിക്കിനി ജീവിതത്തില്‍ രണ്ടു സ്വപ്‌നങ്ങളുണ്ട്. ഒന്ന് അമിതാഭ് ജിക്കൊപ്പം ഒരു സിനിമയില്‍ ജോലി ചെയ്യുകയെന്നതാണ്. മറ്റൊന്ന് ശ്രീ എം ടി വാസുദേവന്‍ നായരുടെ തിരക്കഥ സംവിധാനം ചെയ്യുകയെന്നതും. ഈ രണ്ട് സ്വപ്‌നങ്ങളും വൈകാതെ നടക്കുമെന്ന് പ്രതീക്ഷിക്കുന്നു...'- പ്രിയദർശൻ കുറിച്ചു. 

ഈ പോസ്റ്റിന് ചുവടെയാണ് ആരാധകർ കമന്റുകളിടുന്നത്. ''രണ്ടാമൂഴം ഏറ്റെടുക്കാൻ ഏറ്റവും യോഗ്യനായ സംവിധായകൻ പ്രിയദർശൻ ആണ്. അമിതാഭ് ബച്ചനെയും ചിത്രത്തിൽ ഉൾപ്പെടുത്തുകയാണെങ്കിൽ രണ്ട് സ്വപ്നങ്ങളും സാക്ഷാത്ക്കരിക്കപ്പെടും. മലയാള സിനിമക്കും എംടിക്കും മോഹൻലാലിനും ഇന്ത്യൻ സിനിമക്കും നൽകാവുന്ന ഏറ്റവും വലിയ സമർപ്പണമായിരിക്കുമത്'- കമന്റുകളിലൂടെ ആരാധകർ പറയുന്നു.