പകലും വൈകിട്ടുമായി അഭിനയിക്കാമെന്ന് വിചാരിച്ചു, ജീത്തു സാര്‍ സമ്മതിച്ചില്ല; മമ്മൂട്ടി ചിത്രത്തിനായി മോഹന്‍ലാല്‍ സിനിമ ഉപേക്ഷിക്കേണ്ടിവന്നെന്ന് ഷൈന്‍ ടോം ചാക്കോ

മമ്മൂട്ടി ചിത്രത്തിനായി മോഹന്‍ലാല്‍ സിനിമയില്‍ നിന്ന് പിന്മാറിയതിനെ കുറിച്ച് തുറന്നുപറഞ്ഞ് നടന്‍ ഷൈന്‍ ടോം ചാക്കോ. അമല്‍ നീരദ് സംവിധാനം ചെയ്ത ഭീഷ്മ പര്‍വ്വത്തില്‍ മമ്മൂട്ടിക്കൊപ്പം ശ്രദ്ധേയമായ വേഷം ഷൈന്‍ അവതരിപ്പിച്ചിട്ടുണ്ട്. ഒരു മോഹന്‍ലാല്‍ ചിത്രം വേണ്ടെന്നു വെച്ചാണ് ഷൈന്‍ മമ്മൂട്ടി ചിത്രമായ ഭീഷ്മ പര്‍വ്വത്തില്‍ അഭിനയിച്ചത്. ഒരു ഓണ്‍ലൈന്‍ മാധ്യമത്തിനു നല്‍കിയ അഭിമുഖത്തിലാണ് താരം ഇക്കാര്യം തുറന്നുപറഞ്ഞത്. 

ഒരേസമയം രണ്ട് സൂപ്പര്‍താര ചിത്രങ്ങള്‍ വന്നപ്പോള്‍ താന്‍ മമ്മൂട്ടി ചിത്രമാണ് തിരഞ്ഞെടുത്തതെന്ന് ഷൈന്‍ പറയുന്നു. 2021 ലെ ലോക്ക്ഡൗണിന്റെ സമയത്തായിരുന്നു മോഹന്‍ലാലിന്റെ ട്വല്‍ത്ത് മാന്‍ വന്നതെന്ന് ഷൈന്‍ പറഞ്ഞു. സിനിമയുടെ കഥ കേട്ടു. ചെയ്യാമെന്ന് തീരുമാനിച്ചു. ആ സമയത്ത് ഭീഷ്മ പര്‍വം തീര്‍ന്നിട്ടുണ്ടായിരുന്നില്ല. ഭീഷ്മ പര്‍വ്വമാണ് ആദ്യം കമ്മിറ്റ് ചെയ്തത്. 

രണ്ടു സിനിമകളും ഒരുമിച്ച് കൊണ്ടു പോകാനായിരുന്നു നടന്റെ തീരുമാനം. ഒരു സെറ്റില്‍ രാവിലെ പോയി ചെയ്യുന്നു അടുത്ത സെറ്റില്‍ വൈകിട്ട് പോയി ചെയ്യാം എന്നായിരുന്നു ആലോചിച്ചത്. ഇക്കാര്യം ജീത്തു സാറിനോടും അമല്‍ നീരദിനോടും പറഞ്ഞു. ജീത്തു സാര്‍ സമ്മതിച്ചില്ല. ഷൂട്ടിങ് തുടങ്ങിയാല്‍ ട്വെല്‍ത്ത് മാന്‍ സെറ്റില്‍ മുഴുവന്‍ സമയം വേണ്ടിവരുമെന്ന് പറഞ്ഞു. അപ്പോള്‍ പിന്നെ വേറെ വഴിയില്ല. അങ്ങനെയാണ് ട്വല്‍ത്ത്മാന്‍ വേണ്ടെന്നുവെച്ച് ഭീഷ്മ പര്‍വ്വം തീര്‍ക്കാന്‍ തീരുമാനിച്ചതെന്നും ഷൈന്‍ ടോം ചാക്കോ പറഞ്ഞു.