'ഇതാണ് എന്റെ ഇപ്പോഴത്തെ അവസ്ഥ'; വീഡിയോയുമായി രഞ്ജിനി

Ranjini Haridas

മലയാളത്തിലെ ഏറ്റവും താരമൂല്യമുള്ള സെലിബ്രിറ്റി അവതാരകരുടെ പട്ടികയില്‍ മുന്നിലുണ്ടാകും രഞ്ജിനി ഹരിദാസ്. ടെലിവിഷന്‍ പരിപാടികളിലും സ്റ്റേജ് ഷോകളിലും നിറഞ്ഞുനില്‍ക്കുന്ന സമയത്ത് അഭിനയത്തിന്റെ ലോകത്തും തിളങ്ങാന്‍ താരം ശ്രമം നടത്തിയിരുന്നു. ഇപ്പോള്‍ സോഷ്യല്‍ മീഡിയയുടെ ലോകത്ത് സജീവമായ താരം തന്റെ വിശേഷങ്ങള്‍ യൂട്യൂബ് ചാനലിലൂടെയാണ് പങ്കുവയ്ക്കാറുള്ളത്. അങ്ങനെ രഞ്ജിനി പങ്കുവെച്ച ഒരു വീഡിയോയാണ് ശ്രദ്ധ നേടുന്നത്. മേക്കപ്പ് ആര്‍ട്ടിസ്റ്റ് ആയി ഒരു പരിപാടിയില്‍ പങ്കെടുക്കാന്‍ ചെന്നപ്പോളുണ്ടായ അനുഭവമാണ് രഞ്ജിനി ഷെയര്‍ ചെയ്യുന്നത്.

തന്നെക്കാള്‍ തിരക്കാണ് തന്റെ മേക്കപ്പ് ആര്‍ട്ടിസ്റ്റിന് എന്നാണ് രഞ്ജിനി പറയുന്നത്. പുറത്തേക്കിറങ്ങിയാല്‍ ഉടന്‍തന്നെ മീഡിയ ചുറ്റും നിറയുമെന്ന് പറഞ്ഞുകൊണ്ടാണ് വീഡിയോ പങ്കുവെച്ചത്.

രഞ്ജിനി പറയുന്ന ബിസി മേക്കപ്പ് ആര്‍ട്ടിസ്റ്റ് വേറാരുമല്ല ലക്ഷങ്ങള്‍ പ്രതിഫലം വാങ്ങുന്ന ജാന്‍മണി ദാസാണ്. ബിഗ് ബോസ് മലയാളം ആറാം സീസണ്‍ മത്സരാര്‍ത്ഥിയായിരുന്നു ജാന്‍മണി ദാസ്. മഞ്ജു വാര്യര്‍, ഭാവന, പൂര്‍ണിമ തുടങ്ങിയ പ്രമുഖ താരങ്ങള്‍ക്ക് പുതിയ ലുക്ക് പരീക്ഷിക്കണമെങ്കില്‍ ജാന്‍മണി നിര്‍ബന്ധമാണ്. പുതിയ സിനിമയായ മന്ദാകിനി സിനിമയുടെ പ്രമോഷനുമായി ബന്ധപ്പെട്ടുള്ള പരിപാടിയില്‍ പങ്കെടുക്കാന്‍ പോയപ്പോള്‍ മേക്കപ്പ് ചെയ്യാനായി രഞ്ജിനിയുടെ കൂടെ ജാന്‍മണിയും ഉണ്ടായിരുന്നു.ഹോട്ടല്‍ ലോബിയിലേക്ക് എത്തിയപ്പോഴേക്കും ജാന്‍മണിയെ കാണാനായി മീഡിയ കാത്തുനില്‍പ്പ് ഉണ്ടായിരുന്നു. അവര്‍ എത്തിയതും ചോദ്യങ്ങളുമായി ജാന്‍മണിയെ മീഡിയ വളഞ്ഞു. തന്റെ മേക്കപ്പ് ആര്‍ട്ടിസ്റ്റിന്റെ അഭിമുഖം കിട്ടാന്‍ തിക്കുംതിരക്കും കൂട്ടുന്ന മീഡിയയുടെ വീഡിയോയാണ് രഞ്ജിനി സോഷ്യല്‍ മീഡിയയില്‍ പങ്കിട്ടത്.