ട്വിന്റി ട്വിന്റി എന്ന ചിത്രത്തിലാണ് മമ്മൂട്ടിയും മോഹൻലാലും അവസാനമായി ഒന്നിച്ചഭിനയിച്ചത്. അരക്കള്ളൻ മുക്കാക്കള്ളൻ എന്ന ചിത്രത്തിലൂടെ ഇരുവരും വീണ്ടും ഒന്നിക്കുന്നുവെന്ന് വാർത്തകൾ ഉണ്ടായിരുന്നു. മലയാളത്തിലെ ഏറ്റവും വിലയേറിയ ഇരട്ട തിരക്കഥാകൃത്തുക്കളായി ഉദയകൃഷ്ണ സിബി കെ തോമസ് തന്നെയായിരുന്നു അതിന് പിന്നിൽ.
ഉദയകൃഷ്ണയും സിബി കെ തോമസും മറ്റ് ചിത്രങ്ങളുടെ തിരക്കിലായതോടെ ചിത്രത്തിന്റെ ചർച്ചകൾ അവസാനിച്ചു. എന്നാൽ, ഇപ്പോഴിതാ, അരക്കള്ളന്‍ മുക്കാക്കള്ളന്‍ യാഥാര്‍ത്ഥ്യമാകുന്നുവെന്ന് റിപ്പോർട്ട്. മമ്മൂട്ടിയെ നായകനാക്കി വൈശാഖാണ് ചിത്രം സംവിധാനം ചെയ്യുക.
ആദ്യം പ്രഖ്യാപിച്ചപ്പോൾ മമ്മൂട്ടിയും മോഹന്‍ലാലുമായിരുന്നു മുഖ്യവേഷത്തില്‍. ചിത്രത്തില്‍ ഒരു നാടന്‍ കള്ളനായി ദിലീപും എത്തുമെന്ന് പ്രഖ്യാപിച്ചിരുന്നു. എന്നാൽ, ഇപ്പോൾ ദിലീപും മോഹൻലാലും ചിത്രത്തിൽ ഇല്ലെന്നാണ് സൂചനകൾ.
മോഹന്‍ലാലിനേയും മമ്മൂട്ടിയേയും തുല്യ പ്രാധാന്യമുള്ള ശക്തമായ കഥാപാത്രങ്ങളാക്കി വെള്ളിത്തിരയില്‍ എത്തിക്കും എന്നതായിരുന്നു അരക്കള്ളന്‍ മുക്കാക്കള്ളന്‍ പ്രേക്ഷകര്‍ക്ക് നല്‍കിയ പ്രതീക്ഷ. എന്നാല്‍ ഉദയകൃഷ്ണ സിബി കെ തോമസ് കൂട്ടുകെട്ട് പിരിഞ്ഞതോടെ പ്രേക്ഷകരുടെ പ്രതീക്ഷയും അസ്ഥാനത്തായി. രണ്ട് യുവതാരങ്ങളും ചിത്രത്തിനൊപ്പം ഉണ്ടാകും. ചിത്രത്തെ സംബന്ധിക്കുന്ന മറ്റ് വിവരങ്ങള്‍ പിന്നാലെ ഉണ്ടാകും എന്നാണ് പ്രതീക്ഷിക്കുന്നത്.