പൃഥ്വിയുമായി മത്സരത്തിന് താല്‍പ്പര്യമില്ല, മമ്മൂട്ടി കര്‍ണന്‍ ഉപേക്ഷിച്ചു? !

മമ്മൂട്ടി കര്‍ണന്‍ ഉപേക്ഷിച്ചു? !

‘കര്‍ണന്‍’ എന്ന ബിഗ് ബജറ്റ് പ്രൊജക്ട് മമ്മൂട്ടി ഉപേക്ഷിച്ചതായി സൂചന. പി ശ്രീകുമാറിന്‍റെ തിരക്കഥയില്‍ മധുപാല്‍ ചെയ്യാനിരുന്ന കര്‍ണന് മമ്മൂട്ടി പച്ചക്കൊടി കാട്ടുന്നില്ലെന്നാണ് റിപ്പോര്‍ട്ടുകള്‍. പൃഥ്വിരാജിന്‍റെ കര്‍ണനൊപ്പം ഒരു അനാവശ്യ മത്സരത്തിന് മെഗാസ്റ്റാറിന് താല്‍പ്പര്യമില്ലെന്നാണ് വിവരം. മാത്രമല്ല, ആവശ്യമില്ലാത്ത താരതമ്യപ്പെടുത്തലുകളും മമ്മൂട്ടി ആഗ്രഹിക്കുന്നില്ലത്രേ.

300 കോടി ബജറ്റിലാണ് പൃഥ്വിരാജ് - ആര്‍ എസ് വിമല്‍ ടീമിന്‍റെ കര്‍ണന്‍ ഒരുങ്ങുന്നത്. അത്രയും ടെക്നിക്കല്‍ പെര്‍ഫെക്ഷനില്‍ വരുന്ന ചിത്രത്തോടാണ് മമ്മൂട്ടിച്ചിത്രവും മത്സരിക്കേണ്ടി വരിക. അപ്പോള്‍ അതിനോടൊപ്പം നില്‍ക്കുന്ന ബജറ്റിലാവണം ഈ ചിത്രവും ഒരുക്കേണ്ടത്. ഇത്രയും വലിയ മുതല്‍മുടക്കില്‍ അനാവശ്യ മത്സരങ്ങള്‍ ഉണ്ടാകുന്നത് ഇന്‍ഡസ്ട്രിക്ക് തന്നെ ഗുണകരമല്ലെന്ന നിലപാട് മമ്മൂട്ടിക്കുണ്ട് എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

പൃഥ്വിരാജിന്‍റെ കര്‍ണന്‍റെ പ്രീ പ്രൊഡക്ഷന്‍ ജോലികള്‍ അന്തിമഘട്ടത്തിലാണ്. ഈ സാഹചര്യത്തില്‍ താന്‍ കര്‍ണന്‍ ചെയ്യേണ്ടതില്ല എന്ന നിലപാടിലേക്ക് മമ്മൂട്ടി എത്തിയതായാണ് വിവരം. രഞ്ജിത്തിന്‍റെ ‘വമ്പന്‍’ എന്ന ആക്ഷന്‍ ത്രില്ലറാണ് മമ്മൂട്ടി അടുത്തതായി ചെയ്യുന്നത്. അതിന് ശേഷം ശ്യാം ധര്‍, അഖില്‍ പോള്‍ എന്നിവര്‍ക്ക് ഡേറ്റ് കൊടുത്തിരിക്കുന്നു. 

എന്തായാലും ഏറെ ചര്‍ച്ച ചെയ്യപ്പെട്ട പൃഥ്വി - മമ്മൂട്ടി ‘കര്‍ണന്‍ യുദ്ധ’ത്തിന് ഇതോടെ സമാപനമായിരിക്കുന്നു എന്നുവേണം അനുമാനിക്കാന്‍.