താരപുത്രന്മാർ മലയാള സിനിമയിലേക്ക് വരുന്നത് പുത്തൻ കാഴ്ചയല്ല. ഫഹദ് ഫാസിൽ മുതൽ കാളിദാസൻ വരെ ആ നിര നീളുകയാണ്. ഇപ്പോഴിതാ മറ്റൊരു താരപുത്രൻ കൂടി ആ ലിസ്റ്റിലേക്ക് വരികയാണ്. സംവിധായകൻ വിനയന്റെ മകൻ വിഷ്ണു സിനിമയിൽ അരങ്ങേറ്റം കുറിക്കുകയാണ്.
സിനിമയില്‍ തുടക്കം കുറിക്കുന്നതിനെക്കുറിച്ചുള്ള വാര്‍ത്തകള്‍ നേരത്തെ തന്നെ പുറത്തുവന്നിരുന്നെങ്കിലും ചിത്രത്തിന്റെ റിലീസ് തീയതി നിശ്ചയിച്ചത് ഇപ്പോഴാണ്. വിഷ്ണു ഗോവിന്ദ് സംവിധാനം ചെയ്യുന്ന ഹിസ്റ്റി ഓഫ് ജോയ് യിലൂടെയാണ് വിഷ്ണു തുടക്കം കുറിക്കുന്നത്.
ടൈറ്റില്‍ കഥാപാത്രമായ ജോയ്‌യെ അവതരിപ്പിക്കുന്നത് വിഷ്ണുവാണ്. ശിവപാര്‍വ്വതി ഫിലിംസിന്റെ ബാനറില്‍ കലഞ്ഞൂര്‍ ശശികുമാറാണ് ചിത്രം നിര്‍മ്മിക്കുന്നത്. അപര്‍ണ്ണയും ശിവകാമിയുമാണ് നായികമാരായി എത്തുന്നത്.
നിരവധി അഭിനയ പ്രതിഭകളെ സമ്മാനിച്ച വിനയന്റെ മകന്‍ നായകനാകുന്ന ചിത്രം സംവിധാനം ചെയ്യുന്നത് മെക്‌സിക്കന്‍ അപാരതയില്‍ ടൊവിനോയുടെ സുഹൃത്തായി വേഷമിട്ട വിഷ്ണു ഗോവിന്ദാണ്.