ഫിദല്‍ കാസ്‌ട്രോ ലുക്കിലുള്ള ഡേവിഡ് നൈനാൻ ആരാണ്? ദുല്‍ഖറും കട്ട വെയിറ്റിംഗിലാണ്!

മമ്മൂട്ടിയും ഫിദൽ കാസ്ട്രോയും!

പെരുംമഴയില്‍ കയ്യില്‍ തോക്കേന്തി പുറംതിരിഞ്ഞുനടക്കുന്ന മമ്മൂട്ടിയായിരുന്നു ദ ഗ്രേറ്റ് ഫാദര്‍ ഫസ്റ്റ് ലുക്ക് പോസ്റ്റര്‍. കുറച്ചു കാലമായിട്ട് വേണ്ടത്ര ഹിറ്റൊന്നും ഇല്ലാത്തതിനാൽ മമ്മൂട്ടിയുടെ ആരാധകരും കുറച്ച് വിഷമത്തിലായിരുന്നു. അവർക്കിടയിലേക്കാണ് ഹനീഫ് അദേനി ഗ്രേറ്റ് ഫാദർ എന്ന പ്രോജക്ട് പ്രഖ്യാപിച്ചത്.

അന്നുമുതൽ തുടങ്ങിയ കാത്തിരിപ്പാണ് ഈ ചിത്രത്തിനായി. കാത്തിരിക്കുന്നവരുടെ കൂട്ടത്തിൽ യൂത്ത് ഐക്കൺ ദുൽഖർ സൽമാനും ഉണ്ട്. ഈ വര്‍ഷം ഏറ്റവും പ്രതീക്ഷയര്‍പ്പിക്കുന്ന സിനിമകളിലൊന്നാണ് ഇതെന്നും എറ്റവും സ്‌റ്റൈലിഷായ സിനിമയെന്ന പ്രതീക്ഷയുമാണ് ഫസ്റ്റ് ലുക്കിനൊപ്പം ദുല്‍ഖര്‍ സല്‍മാന്‍ പങ്കുവച്ചത്. ടീസര്‍ പുറത്തുവന്നപ്പോള്‍ കട്ടവെയിറ്റിംഗാണെന്ന് വെളിപ്പെടുത്തി ദുല്‍ഖര്‍. ഇപ്പോഴിതാ കഥാപാത്രത്തിന്റെ ലുക്കിലും ഇഷ്ടമറിയിച്ച ദുല്‍ഖര്‍ ദ ഗ്രേറ്റ് ഫാദറിനായി കാത്തിരിപ്പിലാണെന്നും വെളിപ്പെടുത്തി.

മമ്മൂട്ടിയുടെ കഥാപാത്രത്തെക്കുറിച്ചും സിനിമയുടെ സ്വഭാവത്തെക്കുറിച്ചും കൃത്യമായ സൂചനകള്‍ നല്‍കാതെ രഹസ്യസ്വഭാവത്തിലായിരുന്നു സിനിമയുടെ ചിത്രീകരണം. പുതിയ പോസ്റ്ററില്‍ ക്യൂബന്‍ വിപ്ലവനായകന്‍ ഫിഡല്‍ കാസ്‌ട്രോയുടെ വേഷവിധാനത്തെ അനുസ്മരിപ്പിക്കുന്നുണ്ട് മമ്മൂട്ടിയുടെ ഡേവിഡ് നൈനാന്‍. കയ്യില്‍ നീട്ടിപ്പിടിച്ച തോക്കും. മലയാളത്തില്‍ പുത്തന്‍ ശൈലി സമ്മാനിച്ച ചിത്രമായ ബിഗ് ബിയോടും ഇതിലെ മമ്മൂട്ടിയുടെ നായകകഥാപാത്രമായ ബിലാല്‍ ജോണ്‍ കുരിശിങ്കലിനോടുമാണ് ഡേവിഡ് നൈനാനെ താരതമ്യപ്പെടുത്തുന്നത്.