അടുത്ത സിനിമയില്‍ മമ്മൂട്ടി സ്മ‌ഗ്‌ളര്‍; ഒരു സമ്പൂര്‍ണ ആക്ഷന്‍ ചിത്രം, അനവധി കാര്‍ ചേസുകള്‍ !

മമ്മൂട്ടി സ്മഗ്‌ളറായി അഭിനയിക്കുന്നു. ഒരു തകര്‍പ്പന്‍ ത്രില്ലറാണിത്. മമ്മൂട്ടി ഇതുവരെ പ്രത്യക്ഷപ്പെട്ടിട്ടില്ലാത്ത രീതിയിലുള്ള ആ‍ക്ഷന്‍ രംഗങ്ങളും ഗംഭീര കാര്‍ ചേസുകളുമെല്ലാം നിറഞ്ഞ സിനിമ സംവിധാനം ചെയ്യുന്നത് ഇന്ത്യയിലെ ഏറ്റവും വലിയ സംവിധായകനായ പ്രിയദര്‍ശനാണ്.

ഈ ത്രില്ലര്‍ പൂര്‍ണമായും കേരളത്തിന് വെളിയിലായിരിക്കും ചിത്രീകരിക്കുക എന്നുമറിയുന്നു. ഒപ്പത്തിന് ശേഷം പ്രിയദര്‍ശന്‍ സംവിധാനം ചെയ്യുന്ന ഈ സിനിമയ്ക്ക് പ്രിയന്‍ തന്നെയാണ് തിരക്കഥയൊരുക്കുന്നത്.

ഈ സിനിമയില്‍ ദിലീപും ഉണ്ടായിരിക്കുമെന്നാണ് നേരത്തേ റിപ്പോര്‍ട്ടുകള്‍ വന്നത്. എന്നാല്‍ ദിലീപ് ഈ പ്രൊജക്ടിന്‍റെ ഭാഗമാകില്ലെന്നാണ് പുതിയ വിവരം. വന്‍ മുതല്‍മുടക്കിലാണ് ഈ മമ്മൂട്ടിച്ചിത്രം ഒരുങ്ങുന്നത്.

മുംബൈ പ്രധാന ലൊക്കേഷനാകുമെന്നാണ് ചില റിപ്പോര്‍ട്ടുകള്‍ പറയുന്നത്. ആര്യന്‍, അഭിമന്യു തുടങ്ങിയ പ്രിയദര്‍ശന്‍ ത്രില്ലറുകളുടെ ഗണത്തിലായിരിക്കും ഈ സിനിമയുടെയും സ്ഥാനമെന്നാണ് സൂചന.

മഹേഷിന്‍റെ പ്രതികാരത്തിന്‍റെ തമിഴ് പതിപ്പ്, മിഥുനത്തിന്‍റെയും ഒപ്പത്തിന്‍റെയും ഹിന്ദി പതിപ്പുകള്‍ എന്നീ പ്രൊജക്ടുകളുമായി പ്രിയദര്‍ശന്‍ തിരക്കിലാണ്. അതിനിടയിലാണ് മമ്മൂട്ടിയെ നായകനാക്കിയുള്ള ആക്ഷന്‍ ചിത്രം ഒരുങ്ങുക.