ദിലീപ് - ജോഷി ടീമിന്‍റെ റണ്‍‌വേയ്ക്ക് രണ്ടാം ഭാഗം, ഉദയ്കൃഷ്ണ എഴുതും; വാളയാര്‍ പരമശിവം ഒരുങ്ങുന്നു

റണ്‍‌വേ എന്ന മെഗാഹിറ്റ് ആക്ഷന്‍ സിനിമയ്ക്ക് രണ്ടാം ഭാഗം ഒരുങ്ങുന്നു. ‘വാളയാര്‍ പരമശിവം’ എന്നാണ് ചിത്രത്തിന് പേരിട്ടിരിക്കുന്നത്. ജോഷി സംവിധാനം ചെയ്യുന്ന സിനിമയുടെ ചിത്രീകരണം ഈ വര്‍ഷം അവസാനം ഉണ്ടായേക്കുമെന്ന് സൂചനകള്‍. പുലിമുരുകനിലൂടെ ചരിത്രവിജയം സൃഷ്ടിച്ച ഉദയ്കൃഷ്ണയായിരിക്കും തിരക്കഥ രചിക്കുക.

ഉദയ്കൃഷ്ണ - സിബി കെ തോമസ് ടീമാണ് റണ്‍‌വേയുടെ തിരക്കഥ രചിച്ചത്. എന്നാല്‍ അവര്‍ ഇടക്കാലത്ത് പിരിഞ്ഞിരുന്നു. സിബി കെ തോമസ് ഇപ്പോള്‍ ഒരു സിനിമ സംവിധാനം ചെയ്യാനുള്ള തിരക്കിലാണ്. അതുകൊണ്ടുതന്നെ വാളയാര്‍ പരമശിവം ഉദയ്കൃഷ്ണ തനിച്ചെഴുതുമെന്നാണ് വിവരം.

വാളയാര്‍ പരമശിവം വമ്പന്‍ ബജറ്റിലാണ് ഒരുങ്ങുന്നത്. തകര്‍പ്പന്‍ ആക്ഷന്‍ രംഗങ്ങളും ചേസ് രംഗങ്ങളും സിനിമയുടെ ഹൈലൈറ്റായിരിക്കും. ലൈലാ ഓ ലൈലായുടെ കനത്ത പരാജയത്തിന് ശേഷം സിനിമയില്‍ നിന്ന് താല്‍ക്കാലിക അവധിയെടുത്തിരിക്കുന്ന ജോഷി തന്‍റെ വന്‍ തിരിച്ചുവരവിന് ഈ ദിലീപ് ചിത്രത്തിലൂടെ കളമൊരുക്കുകയാണ് എന്നാണ് റിപ്പോര്‍ട്ടുകള്‍. 

ദിലീപ് തന്നെയായിരിക്കും വാളയാര്‍ പരമശിവം നിര്‍മ്മിക്കുന്നതെന്നും സൂചനയുണ്ട്. എന്നാല്‍ ഈ സിനിമയില്‍ കാവ്യാ മാധവന്‍ തന്നെ നായികയാകുമോ എന്ന് ഉറപ്പായിട്ടില്ല.