സിങ്കം 3 മാറ്റിവച്ചു, മോഹന്‍ലാലിന് കെണിയാകുമോ?

സൂര്യ വരുന്നു, മോഹന്‍ലാലിന് ഉറക്കം നഷ്ടമാകുമോ?

തമിഴ് സിനിമകള്‍ വരുമ്പോള്‍ മലയാള സിനിമകളെ മറക്കുന്ന ഒരേര്‍പ്പാട് മലയാളത്തിലെ തിയേറ്ററുകള്‍ പലപ്പോഴും വച്ചുപുലര്‍ത്താറുണ്ട്. ക്രിസ്മസ് കാലം അങ്ങനെയൊരു കാര്യത്തിന് സാക്‍ഷ്യം വഹിക്കുമോ എന്നാണ് മലയാള സിനിമാലോകം ഉറ്റുനോക്കുന്നത്.

സൂര്യയുടെ പുതിയ ചിത്രം സിങ്കം 3 (‘എസ് 3’ എന്നാണ് ഔദ്യോഗികനാമം) യാഥാര്‍ത്ഥത്തില്‍ ഡിസംബര്‍ മധ്യത്തോടെ റിലീസ് ചെയ്യാനിരുന്നതാണ്. എന്നാല്‍ ഇപ്പോള്‍ റിലീസ് ഒരാഴ്ച കഴിഞ്ഞ് മതി എന്നാണ് അണിയറപ്രവര്‍ത്തകര്‍ തീരുമാനിച്ചിരിക്കുന്നത്. കൃത്യമായി പറഞ്ഞാല്‍ ഡിസംബര്‍ 23ന് ക്രിസ്മസ് റിലീസായി എസ് 3 പ്രദര്‍ശനത്തിനെത്തും.

ഹരി സംവിധാനം ചെയ്ത എസ് 3 ഒരു ഹൈ വോള്‍ട്ടേജ് ആക്ഷന്‍ ത്രില്ലറാണ്. ചിത്രം കേരളത്തില്‍ നൂറിലധികം തിയേറ്ററുകളില്‍ റിലീസ് ചെയ്യുമെന്ന് നിസംശയം പറയാം. അതേസമയത്ത് മോഹന്‍ലാലിന്‍റെ സിനിമ ‘മുന്തിരിവള്ളികള്‍ തളിര്‍ക്കുമ്പോള്‍’ പ്രദര്‍ശനത്തിനെത്തുന്നുണ്ട്.

എസ് 3 മോഹന്‍ലാലിന്‍റെ മുന്തിരിവള്ളികള്‍ക്ക് പാരയാകുമോ എന്ന ആശങ്ക ഇപ്പോള്‍ മലയാള സിനിമാപ്രേമികള്‍ക്കുണ്ട്. ആ സമയത്തുതന്നെ ദുല്‍ക്കര്‍ സല്‍മാന്‍റെ ജോമോന്‍റെ സുവിശേഷങ്ങളും തിയേറ്ററുകളിലുണ്ടാവും.

എന്തായാലും സൂര്യയുടെ എസ് 3 വലിയ ഹിറ്റാകുമോ എന്ന് കാത്തിരിക്കാം. വിജയ് കഴിഞ്ഞാല്‍ പിന്നെ കേരളത്തില്‍ സൂര്യ ആരാധകരാണ് കൂടുതല്‍ എന്നതിനാല്‍ മലയാളത്തിലെ സൂപ്പര്‍താരങ്ങള്‍ക്ക് ക്രിസ്മസ് കാലത്ത് അല്‍പ്പം ഉറക്കം നഷ്ടപ്പെടാന്‍ സാധ്യതയുണ്ട്.