| ഇരുപത്തിയേഴ് കൊല്ലം മാതൃഭൂമി ആഴ്ചപ്പതിപ്പില് രേഖാ ചിത്രകാരനായി കഴിഞ്ഞതില്‍ ഒതുങ്ങുന്നു ശിവരാമന്‍ നായരുടെ കലാജീവിതം. പക്ഷെ, ആ ഇരുപത്തിയേഴ് കൊല്ലം കേരളീയ രേഖാചിത്ര ചരിത്രത്തിലെ ഏറ്റവും മികച്ച കാലഘട്ടമായിരുന്നു എന്നു പറയേണ്ടിവരും. കെ.സി.എസ്. പണിക്കരുടെ ശിഷ്യനായി വരച്ചു വളര്‍ന്ന എ.എസ്.നായര്‍ മാതൃഭൂമിയില്‍ മാത്രം ഒതുങ്ങുകയും, രേഖാ ചിത്ര രചനയിലും കാര്‍ട്ടൂണില്‍ മാത്രം ഒതുങ്ങുകയും ചെയ്‌തുവെങ്കിലും അദ്ദേഹത്തിന്‍റെ ചിത്ര സഞ്ചയം അമൂല്യമായൊരു നിധിയാണ്‌ . ഇന്ത്യയുടെ രേഖാ ചിത്ര പാരമ്പര്യത്തിന്‍റെ തനിമയും ഓജസ്സും വൈവിദ്ധ്യവും അതില്‍ നിറഞ്ഞുനില്‍ക്കുന്നു. 1988 ജൂണ്‍ 30ന്‌ അമ്പത്തിരണ്ടാം വയസ്സില്‍ എ.എസ്.നായര്‍ അപ്രതീക്ഷിതമായി അന്തരിച്ചു. മാതൃഭൂമിയുടെ കോഴിക്കോട്‌ ഓഫീസിലേക്ക്‌ ഓട്ടോറിക്ഷയില്‍ എത്തിയ ഏ എസ് സ്വന്തം മുറിയില്‍ എത്തും മുമ്പെ കുഴഞ്ഞ്‌ വീണ്‌ മരിക്കുകയായിരുന്നു. ഒരു ചിത്രകാരന്‍റെ സ്റ്റീരിയോ ടൈപ്പ്‌ പരിവേഷങ്ങള്‍ ഒന്നുമില്ലാത്ത തനി നാടന്‍ മനുഷ്യനായിരുന്നു എ.എസ്.നായര്‍. തനി ഗ്രാമീണന്‍ - നോക്കിലും വാക്കിലും നടപ്പിലും സംസാരത്തിലുമെല്ലാം.
|