പ്രണയവിവാഹം; വിവാഹ വേഷം അഴിക്കും മുൻപേ നവദമ്പതിമാർക്ക് ദാരുണാന്ത്യം

ഇടിയുടെ ആഘാതത്തില്‍ നിരവധി തവണ മലക്കം മറിഞ്ഞാണ് കാര്‍ കുഴിയിലേക്ക് പതിച്ചതെന്ന് ദൃക്സാക്ഷികള്‍ പറഞ്ഞു.

വിവാഹം കഴിഞ്ഞ് നിമിഷങ്ങള്‍ക്കകം നവദമ്പതികള്‍ക്ക് ദാരുണാന്ത്യം. വിവാഹശേഷം സൽക്കാര വേദിയിലേക്ക് പുറപ്പെട്ട ടെക്സാസ് സ്വദേശികളായ ഹാര്‍ലി മോര്‍ഗനും വധു റിയാനന്‍ ബുഡ്റിയോക്‌സും സഞ്ചരിച്ച കാറിൽ ട്രക്ക് ഇടിക്കുകയായിരുന്നു. ഇടിയുടെ ആഘാതത്തില്‍ നിരവധി തവണ മലക്കം മറിഞ്ഞാണ് കാര്‍ കുഴിയിലേക്ക് പതിച്ചതെന്ന് ദൃക്സാക്ഷികള്‍ പറഞ്ഞു. വരനായിരുന്നു വാഹനം ഓടിച്ചത്. വെള്ളിയാഴ്ചയായിരുന്നു  ബാല്യകാല സുഹൃത്തുക്കളായ 19-കാരനായ മോര്‍ഗനും 20 -കാരിയായ റിയാനനും വിവാഹിതരായത്.

വിവാഹം കഴിഞ്ഞ് വിവാഹവേദിയായ ജസ്റ്റിസ് ഓഫ് പീസ് കെട്ടിടത്തില്‍ നിന്ന് പുറത്തേക്കിറങ്ങിയപ്പോഴായിരുന്നു അപകടം സംഭവിച്ചത്.ട്രക്ക് ഡ്രൈവറെ തിരിച്ചറിഞ്ഞിട്ടില്ല. സംഭവത്തില്‍ അസ്വാഭാവികത ഇല്ലെന്നും അന്വേഷണം പുരോഗമിക്കുകയാണെന്നും പൊലീസ് അറിയിച്ചു.