ഐപിഎല്‍ ഒന്നാം ക്വാളിഫയറില്‍ ചെന്നൈ സൂപ്പര്‍ കിങ്‌സിനോട് തോറ്റ ഡല്‍ഹി ക്യാപിറ്റല്‍സിനെതിരെ ആരാധകര്‍. ഡല്‍ഹി നായകന്‍ റിഷഭ് പന്തിനെതിരെ സോഷ്യല്‍ മീഡിയയില്‍ നിരവധിപേര്‍ രംഗത്തെത്തി. പന്ത് മാച്ച് ഫിക്‌സിങ് നടത്തിയോ എന്നാണ് ആരാധകര്‍ ചോദിക്കുന്നത്. അവസാന ഓവര്‍ ടോം കറാന് നല്‍കിയതാണ് ആരാധകരെ ചൊടിപ്പിച്ചത്. കഗിസോ റബാഡയെ പോലെ പരിചയ സമ്പത്തുള്ള സീനിയര്‍ താരത്തിനു ഒരോവര്‍ ശേഷിക്കെ സ്ലോ ബോളുകള്‍ എറിയുന്ന ടോം കറാന് അവസാന ഓവര്‍ നല്‍കിയത് വിവേകശൂന്യമായ നടപടിയായെന്ന് പലരും കുറ്റപ്പെടുത്തി.
അക്ഷര്‍ പട്ടേലിനും ഒരു ഓവര്‍ ബാക്കിയുണ്ടായിരുന്നു. എന്നാല്‍, താരതമ്യേന നല്ല രീതിയില്‍ മൂന്ന് ഓവര്‍ എറിഞ്ഞതിനാലാണ് ടോം കറാന് അവസാന ഓവര്‍ നല്‍കാന്‍ താന്‍ തീരുമാനിച്ചതെന്നാണ് പന്തിന്റെ ന്യായീകരണം. ടോം കറാന്റെ അവസാന ഓവറില്‍ 13 റണ്‍സാണ് ചെന്നൈ സൂപ്പര്‍ കിങ്‌സിനു ജയിക്കാന്‍ വേണ്ടിയിരുന്നത്. അവസാന ഓവറിലെ നാലാം പന്തില്‍ മത്സരം ചെന്നൈ ജയിച്ചു.