ഇന്ത്യയില് വന്വിജയമായി മാറിയ ഐപിഎല് മാതൃകയിലുള്ള ട്വന്റി-20 ക്രിക്കറ്റ് മത്സരങ്ങള് അമേരിക്കയിലും ആരംഭിക്കുന്നു. അമേരിക്കന് പ്രീമിയര് ലീഗ് എന്ന് പേരിട്ടിരിക്കുന്ന മത്സരം ഒക്ടോബറില് ന്യൂയോര്ക്കിലാണ് ആരംഭിക്കുക. ആഫ്രിക്കന് വാരികയായ റാപ്പോര്ട്ടാണ് ഇക്കാര്യം റിപ്പോര്ട്ട് ചെയ്തിരിക്കുന്നത്.
വര്ഷത്തില് രണ്ട് ടൂര്ണ്ണമെന്റ് നടത്താനാണ് പദ്ധതിയിട്ടിരിക്കുന്നത്. ആദ്യഘട്ടം ഒക്ടോബര് ആറ് മുതല് 26 വരെ നടക്കും. ന്യൂയോര്ക്കാണ് ഈ ടൂര്ണ്ണമെന്റിന് വേദിയാകുക. ഏപ്രിലില് ഫ്ലോറിഡയിലാണ് രണ്ടാം ടൂര്ണ്ണമെന്റ് നടക്കുക.
പ്രീമിയം അമേരിക്ക, പ്രീമിയം ഇന്ത്യ, പ്രീമിയം പാകിസ്ഥാന്, പ്രീമിയം വിന്ഡീസ്, പ്രീമിയം ബംഗ്ലാദേശ്, പ്രീമിയം വേള്ഡ് ടീം എന്നിവയാണ് ടൂര്ണ്ണമെന്റില് പങ്കെടുക്കുന്ന ടീമുകള്. എന്നാല് താരങ്ങള് ആരൊക്കെയാണെന്ന് വ്യക്തമായിട്ടില്ല.
ആദ്യ റൌണ്ടില് ടീമുകള് പരസ്പരം ഓരോ തവണ ഏറ്റുമുട്ടും. സെമിയും ഫൈനലും ടൂര്ണ്ണമെന്റില് ഉണ്ടാകും. ഇന്ത്യയിലെ ഐപിഎല് മത്സരങ്ങളുടെ വന് വിജയമാണ് ടൂര്ണ്ണമെന്റ് ആരംഭിക്കാന് അമേരിക്കയെയും പ്രേരിപ്പിച്ചതെന്ന് വിലയിരുത്തപ്പെടുന്നു.
ദക്ഷിണാഫ്രിക്കന് മുന് താരങ്ങളായ നിക്കി ബോയെ, ആന്ഡ്രൂ ഹാള്, ലാന്ഡ്സ് ക്ലൂസ്നര് എന്നിവര് പ്രീമിയം വേള്ഡ് ടീമില് കരാറൊപ്പിട്ട് കഴിഞ്ഞതായി വാരിക റിപ്പോര്ട്ട് ചെയ്യുന്നു. ഐസിഎല് പങ്കാളിത്തത്തിന്റെ പേരില് ഈ മൂന്ന് താരങ്ങളെയും അന്താരാഷ്ട്ര മത്സരങ്ങളില് നിന്ന് ദക്ഷിണാഫ്രിക്കന് ക്രിക്കറ്റ് ബോര്ഡ് വിലക്കിയിരിക്കുകയാണ്.