ഇനി പേടിക്കാനെന്തിരിക്കുന്നു? പടക്കം പൊട്ടിച്ചാഘോഷിക്കും: ധർമജൻ

2500 രൂപയുടെ പടക്കം പൊട്ടിച്ചാഘോഷിക്കും: ധർമജൻ

കൊച്ചിയിൽ നടിയെ ആക്രമിച്ച കേസിലെ ഗൂഢാലോചനയുമായി ബന്ധപ്പെട്ട് റിമാൻഡിൽ കഴിഞ്ഞിരുന്ന നടൻ ദിലീപ് ഇന്നലെയാണ് ജാമ്യം ലഭിച്ച് പുറത്തിറങ്ങിയത്. ജാമ്യം ലഭിച്ചതറിഞ്ഞ് നിരവധി ആരാധകരും സിനിമാ പ്രവർത്തകരും ആലുവ സബ്ജയിലിനു മുന്നിൽ എത്തിയിരുന്നു. അക്കൂട്ടത്തിൽ ധർമജനും ഉണ്ടായിരുന്നു. 

ഇനി പേടിക്കാനൊന്നുമില്ല. വാങ്ങിവെച്ച പടക്കം പൊട്ടിച്ച് ആഘോഷിക്കുമെന്ന് ധർമജൻ മാധ്യമ പ്രവർത്തകരോട് വ്യക്തമാക്കി. 'എന്നെ സിനിമയില്‍ കൊണ്ടുവന്ന ആളാണ് ദിലീപ്. ദിലീപ് കുറ്റം ചെയ്യില്ലെന്ന് തന്നെയാണ് അന്നും ഇന്നും വിശ്വസിക്കുന്നത്. വീട്ടില്‍ 2500 രൂപയുടെ പടക്കം വാങ്ങിവെച്ചിട്ടുണ്ട്. ആ പടക്കം പൊട്ടിച്ച് ജാമ്യം ആഘോഷിക്കും. ഇനിയൊന്നും പേടിക്കാനില്ലെന്നും ധര്‍മ്മജന്‍ പറഞ്ഞു. 

എന്റെ ചേട്ടനാണ്.. ജാമ്യം കിട്ടിയതില്‍ അതീവ സന്തോഷമുണ്ട്... അദ്ദേഹത്തെ എനിക്കൊന്ന് കണ്ടാൽ മതി, ഇത്രയും പറഞ്ഞായിരുന്നു ധർമ്മജൻ പൊട്ടിക്കരഞ്ഞത്. ജനപ്രിയ നടന് ജാമ്യം ലഭിച്ചതറിഞ്ഞതോടെ അദ്ദേഹത്തിന്റെ ആരാധകര്‍ ഉള്‍പ്പെടെ വൻ ജനക്കൂട്ടമായിരുന്നു ആലുവ സബ്ജയിലിന് മുന്നിലെത്തിയത്. 

ജാമ്യം ലഭിച്ച വിവരം അറിഞ്ഞ ഉടൻ തന്നെ ദിലീപ് ആരാധകർ ജയിലിന് മുന്നിൽ ലഡു വിതരണം നടത്തുകയും ചെയ്തു. ഇന്ന് ഉച്ചയ്ക്കാണ് ഹൈക്കോടതി കര്‍ശന ഉപാധികളോടെ ദിലീപിന് ജാമ്യം അനുവദിച്ചത്. 85 ദിവസത്തെ ജയിൽ വാസത്തിന് ശേഷമാണ് ദിലീപിന് ജാമ്യം ലഭിക്കുന്നത്.