‘ദിലീപിന്റെ നിര്‍ദ്ദേശപ്രകാരമാണ് അങ്ങനെ ചെയ്തത്’; നടിയെ ആക്രമിച്ച കേസില്‍ ജനപ്രിയന് തിരിച്ചടിയായി അപ്പുണ്ണിയുടെ മൊഴി

ദിലീപിന് കെണിയായി അപ്പുണ്ണിയുടെ മൊഴി

നടൻ ദിലീപിന് തിരിച്ചടിയായി അദ്ദേഹത്തിന്റെ മാനേജർ അപ്പുണ്ണിയുടെ മൊഴി. കേസിലെ മുഖ്യപ്രതിയായ പള്‍സര്‍ സുനിയെ തനിക്ക് അറിയാമെന്നും ജയിലിൽ നിന്ന് സുനി അയച്ച കത്തിന്റെ കാര്യം സംസാരിക്കാൻ ഏലൂരിൽ പോയിരുന്നുവെന്നും അപ്പുണ്ണി പൊലീസിനോട് പറഞ്ഞു. ഇതോടെ സുനിയെ തനിക്കറിയില്ലെന്ന ദിലീപിന്റെ വാദമാണ് പൊളിഞ്ഞത്. 

ജയിലില്‍ വച്ച് സുനി നിരവധി തവണ അപ്പുണ്ണിയെ വിളിച്ചതിന്റെ എല്ലാ രേഖകളും പൊലീസിനു ലഭിച്ചിരുന്നു. സുനി വിളിക്കുന്ന സമയത്തെല്ലാം ദിലീപ് തന്റെ അടുത്തു തന്നെയുണ്ടായിരുന്നുവെന്നും അപ്പുണ്ണി വെളിപ്പെടുത്തി. സുനി പറഞ്ഞ കാര്യങ്ങളെല്ലാം താന്‍ ദിലീപിനോട് പറഞ്ഞിരുന്നതായും ദിലീപ് പറഞ്ഞത് അനുസരിച്ചാണ് സുനിയോട് താൻ സംസാരിച്ചതെന്നും അപ്പുണ്ണി വെളിപ്പെടുത്തി.  

ജ​യി​ലിൽ വച്ച്പൾ​സർ സു​നി എ​ഴു​തിയ ക​ത്ത് വി​ഷ്ണുവാണ് ത​നി​ക്ക് വാ​ട്സ് ആ​പ് ചെ​യ്തി​രു​ന്നത്. ഇതിന്റെ കാര്യം സംസാരിക്കാനാണ് ഏലൂരിലെ ടാക്സി സ്റ്റാൻഡിൽ പോയതെന്നും അപ്പുണ്ണി പറഞ്ഞു. ഇതിന്റെ കൂടുതൽ വിശദാംശങ്ങൾ ലഭിക്കുന്നതിനായി അപ്പുണ്ണിയെ വീണ്ടും അന്വേഷണ സംഘം ചോദ്യം ചെയ്യും.