മുഖ്യമന്ത്രി ഉൾപ്പെടെ 27 രാഷ്ട്രീയ നേതാക്കളുടെ ഫോൺ ചോർത്തുന്നു, സിപിഎം നേതാക്കൾക്കുപോലും രക്ഷയില്ല: അനില്‍ അക്കര

മുഖ്യമന്ത്രി പിണറായി വിജയന്‍ ഉൾപ്പെടെ 27 രാഷ്ട്രീയ നേതാക്കളുടെ ഫോൺ ചോർത്തുന്നു: അനില്‍ അക്കര

സംസ്ഥാനത്ത് മുഖ്യമന്ത്രി പിണറായി വിജയന്‍ ഉൾപ്പെടെ 27 രാഷ്ട്രീയ നേതാക്കളുടെ ഫോൺ ചോർത്തുന്നുവെന്ന് എം എൽ എ അനില്‍ അക്കര. സി പി എം നേതാക്കൾക്കുപോലും ഫോൺ ചോർത്തലിൽനിന്ന് രക്ഷയില്ലെന്ന് അദ്ദേഹം നിയമസഭയില്‍ പറഞ്ഞു. ഇക്കാര്യത്തിൽ ബിഎസ്എൻഎല്ലിനോട് പരാതിപ്പെട്ടിട്ടും നടപടിയില്ലെന്ന് അനിൽ അക്കര ആരോപിച്ചു. 

നിയമസഭയില്‍ ധനവിനിയോഗ ബില്ലിന്റെ ചർച്ചയ്ക്കിടയിലാണ് എം എൽ എ ആരോപണവുമായി രംഗത്തെത്തിയത്. അതേസമയം, ആരാണ് ഇതിനു പിന്നിൽ എന്ന കാര്യം അനിൽ അക്കര വ്യക്തമാക്കിയില്ല. ഭരണ - പ്രതിപക്ഷത്തുള്ള 27 നേതാക്കളുടെ ഫോൺ ചോർത്തുന്നുവെന്നുമാത്രമാണ് ആരോപണമുയര്‍ന്നത്. എന്നാല്‍ ഫോൺ ചോർത്തുന്നത് ബിഎസ്എൻഎൽ ആണോ, പൊലീസ് ആണോ, കേന്ദ്ര ഏജൻസികൾ ഏതെങ്കിലും ആണോ എന്നതില്‍ ഒരു സൂചനയുമില്ല.