വയനാട്ടിൽ കാറിനു സൈഡ് നൽകവേ നിയന്ത്രണം വിട്ട ബസ് തലകീഴായി മറിഞ്ഞ് ഒരാൾ മരിച്ചു. ബത്തേരി ദൊട്ടപ്പൻ‌കുളത്ത് ഇന്ന് രാവിലെയായിരുന്നു സംഭവം. സംഭവത്തിൽ വിദ്യാർത്ഥികൾ ഉൾപ്പെടെ നിരവധിയാളുകൾക്ക് പരിക്കേറ്റു. ബത്തേരിയിൽ നിന്നും കൽപ്പറ്റയിലേക്ക് പോവുകയായിരുന്ന സ്വകാര്യ ബസാണ് അപകടത്തിൽ പെട്ടത്.
അമ്പലവയൽ നെല്ലാറച്ചാൽ സ്വദേശി വിപിൻ (27) ആണ് മരിച്ചത്. ബസ് യാത്രികനായിരുന്നു വിപിൻ. അപകടത്തിൽ പരിക്കേറ്റവരെ ബത്തേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഗുരുതരമായി പരുക്കേറ്റവരെ കോഴിക്കോട് മെഡിക്കൽ കോളേജിലേക്ക് കൊണ്ടുപോയി.
വയനാട് ജില്ലാ യൂത്ത് ലീഗ് വൈസ് പ്രസിഡന്റ് വിഎം അബൂബക്കർ സഞ്ചരിച്ച കാറിനു സൈഡ് നൽകവേയാണ് ബസ് മറിഞ്ഞത്. അദ്ദേഹത്തിന്റെ പരിക്ക് ഗുരുതരമായതിനാൽ കോഴിക്കോടേക്ക് കൊണ്ട് പോയി.
എതിരെ വന്ന കാറിന് വഴിമാറുന്നതിനിടെ ഒരു സൈഡിലേക്ക് ചെരിഞ്ഞ് മുന്നോട്ട് നീങ്ങിയ ബസ് റോഡ് സൈഡിലുള്ള മരത്തിലിടിച്ച് തലകീഴായി മറിയുകയായിരുന്നുവെന്ന് ദൃക്സാക്ഷികൾ പറയുന്നു. നാട്ടുകാരുടെ പെട്ടന്നുള്ള ഇടപെടൽ പരിക്കേറ്റവർക്ക് ഉടൻ തന്നെ ചികിത്സ നൽകാൻ സഹായിച്ചിട്ടുണ്ട്.