കാക്കനാട് ഷവര്‍മ കഴിച്ചു ഗുരുതരാവസ്ഥയിലായിരുന്ന യുവാവ് മരിച്ചു

ഷവര്‍മ കഴിച്ചതിനെ തുടര്‍ന്ന് രാഹുലിന് ഛര്‍ദിയും വയറിളക്കവും ഉണ്ടായി

കാക്കനാട് ഷവര്‍മ കഴിച്ചു ഗുരുതരാവസ്ഥയില്‍ ആയിരുന്ന യുവാവ് മരിച്ചു. കോട്ടയം സ്വദേശി രാഹുല്‍ ഡി നായര്‍ ആണ് ചികിത്സയിലിരിക്കെ മരിച്ചത്. കാക്കനാട്ടെ സ്വകാര്യ കമ്പനിയില്‍ ജോലി ചെയ്യുകയായിരുന്നു രാഹുല്‍. കഴിഞ്ഞ 18 നാണ് കാക്കനാട് മാവേലിപുരത്തെ ലേ ഹയാത്ത് ഹോട്ടലില്‍ നിന്ന് ഇയാള്‍ ഷവര്‍മ വാങ്ങി കഴിച്ചത്. 

ഷവര്‍മ കഴിച്ചതിനെ തുടര്‍ന്ന് രാഹുലിന് ഛര്‍ദിയും വയറിളക്കവും ഉണ്ടായി. കാക്കനാട്ടെ പ്രാഥമിക ആരോഗ്യ കേന്ദ്രത്തില്‍ ചികിത്സ തേടിയെങ്കിലും ആരോഗ്യനില മോശമായതിനെ തുടര്‍ന്ന് സ്വകാര്യ ആശുപത്രിയില്‍ അഡ്മിറ്റാക്കി. ഓണ്‍ലൈന്‍ ആയി ഓര്‍ഡര്‍ ചെയ്താണ് രാഹുല്‍ ഷവര്‍മ കഴിച്ചത്. 

യുവാവിന്റെ ബന്ധുക്കളുടെ പരാതിയെ തുടര്‍ന്ന് തൃക്കാക്കര നഗരസഭാ ആരോഗ്യവിഭാഗം ഹോട്ടല്‍ പൂട്ടിച്ചിരുന്നു. പിന്നീട് ഭക്ഷ്യസുരക്ഷാ വിഭാഗം ഹോട്ടലിലെത്തി സാമ്പിള്‍ ശേഖരിച്ച് പരിശോധനയ്ക്ക് അയച്ചു. യുവാവിന്റെ ബന്ധുക്കള്‍ ഹോട്ടലിനെതിരെ തൃക്കാക്കര പൊലീസില്‍ പരാതി നല്‍കിയിട്ടുണ്ട്. ഹോട്ടലുടമയ്‌ക്കെതിരെ കേസെടുത്ത് പൊലീസ് അന്വേഷണം ആരംഭിച്ചു.