മുണ്ട് മടക്കി കുത്തി ജോജു പുറത്തിറങ്ങി; കോണ്‍ഗ്രസിന്റെ വഴി തടയല്‍ സമരത്തിനെതിരെ പ്രതിഷേധം, പൊട്ടിത്തെറിച്ച് താരം

ഇന്ധനവില വര്‍ധനയ്‌ക്കെതിരെ കോണ്‍ഗ്രസിന്റെ റോഡ് ഉപരോധ സമരത്തില്‍ നാടകീയ രംഗങ്ങള്‍. വഴി തടഞ്ഞുകൊണ്ട് ജനങ്ങളെ ഉപദ്രവിക്കുന്ന സമരത്തിനെതിരെ നടന്‍ ജോജു ജോര്‍ജ് രംഗത്തെത്തി. അരമണിക്കൂറില്‍ ഏറെയായി ഇടപ്പള്ളി മുതല്‍ വൈറ്റില വരെയുള്ള റോഡിന്റെ ഇടതു ഭാഗം അടച്ചിട്ട് പ്രതിഷേധ സമരം നടത്തുന്നതിന് എതിരെയാണ് ജോജു പ്രതിഷേധിച്ചത്. 

ദേശീയ പാതയില്‍ വന്‍ ഗതാഗത തടസമാണ് ഉണ്ടായിരിക്കുന്നത്. ഇതിനെതിരെ റോഡില്‍ ഇറങ്ങിയ ജോജുവും സമരത്തെ അനുകൂലിക്കുന്നവരും തമ്മില്‍ വാക്കു തര്‍ക്കമുണ്ടായി. രോഗികള്‍ ഉള്‍പ്പെടെ നൂറുകണക്കിന് ആളുകള്‍ ഏറെ നേരം വഴിയില്‍ കുടുങ്ങിയതോടെയാണ് ജോജു ഉള്‍പ്പെടെ നിരവധി പേര്‍ പ്രതിഷേധവുമായി രംഗത്തെത്തിയത്. തുടര്‍ന്ന് പൊലീസ് എത്തി ആളുകളെ ഒഴിപ്പിച്ചു. ജോജുവിന്റെ വാഹനം കടത്തിവിടില്ലെന്ന് കോണ്‍ഗ്രസ് പ്രവര്‍ത്തകര്‍ ഉറപ്പിച്ചു പറഞ്ഞു. ജോജുവിന്റെ വാഹനത്തിനു മുന്നില്‍ പ്രതിഷേധക്കാര്‍ കയറിയിരിന്നു. ഇതിനിടയില്‍ പ്രതിഷേധക്കാര്‍ ജോജു ജോര്‍ജിന്റെ വാഹനം തകര്‍ത്തു.