ഷാജുവിനെ കൊന്ന് ജോൺസണെ സ്വന്തമാക്കാൻ ആഗ്രഹിച്ചു, ജോൺസ‌ന്റെ ഭാര്യയെ കൊല്ലാൻ ശ്രമിച്ചു: ജോളി

കൂടത്തായി കൊലപാതക പരമ്പരയിലെ ചുരുളുകൾ ഓരോന്നായി മുഖ്യപ്രതി ജോളി തന്നെ വെളിപ്പെടുത്തുകയാണ്. തന്റെ പ്രവൃത്തിയിൽ സംശയം തോന്നിയ റോയിയെ കൊലപ്പെടുത്തി ഷാജുവിനെ ജോളി സ്വന്തമാക്കി. പ്രതീക്ഷിച്ച ദാമ്പത്യ ജീവിതം ലഭിക്കാതെ വരികയും റോയിയെ പോലെ തന്റെ ചെയ്തികളെ ഷാജുവും ചോദ്യം ചെയ്യാൻ തുടങ്ങിയതോടെ ഷാജുവിനേയും കൊലപ്പെടുത്താൻ പ്ലാൻ ഉണ്ടായിരുന്നുവെന്ന് പൊലീസിനു മൊഴി നൽകി ജോളി. 

ഷാജുവിനെ കൊലപ്പെടുത്തി മൂന്നാമത് വിവാഹം കഴിക്കാനായിരുന്നു ജോളിയുടെ പ്ലാൻ. ബിഎസ്എന്‍എല്‍ ജീവനക്കാരനായ ജോണ്‍സണെ സ്വന്തമാക്കാനായാണ് ഷാജുവിനെ ഇല്ലായ്മ ചെയ്യാന് ആഗ്രഹിച്ചത്. ഇതിനായി ജോണ്‍സന്റെ ഭാര്യയേയും കൊലപ്പെടുത്താന്‍ ശ്രമം നടത്തിയെന്നും ജോളി പൊലീസിന് മൊഴി നല്‍കി. 

വിഷം നല്‍കി കൊല്ലാനായിരുന്നു പ്ലാൻ. വിഷം കലര്‍ന്ന ഭക്ഷണം നല്‍കാന്‍ ശ്രമിച്ചെങ്കിലും കഴിക്കാത്തതിനാല്‍ ആണ് ജോണ്‍സന്റെ ഭാര്യ രക്ഷപ്പെട്ടതെന്നും ജോളിയുടെ മൊഴിയില്‍ പറയുന്നു.

ജോളി ഏറ്റവും കൂടുതല്‍ തവണ ഫോണില്‍ വിളിച്ചതായി കണ്ടെത്തിയ ബിഎസ്എന്‍ എല്‍ ജീവനക്കാരന്‍ ആണ് ജോണ്‍സണ്‍. മുഖ്യ പ്രതി ജോളിയുമായി സൗഹൃദമുണ്ടെന്ന് ജോണ്‍സണ്‍ മൊഴി നല്‍കിയിരുന്നു. ഇരുവരും ഒരുമിച്ച് നിരവധി തവണ കോയമ്പത്തൂരിൽ പോയിട്ടുണ്ട്.