ഞങ്ങള്‍ മരിച്ചെന്നോ ?; പരേതന്‍ തിരിച്ചു വന്നതോടെ പുലിവാല് പിടിച്ച സുരേന്ദ്രന്‍ വീണ്ടും വെട്ടിലായി - ഇനി നിയമയുദ്ധം

ഞങ്ങള്‍ മരിച്ചെന്നോ ?; പരേതന്‍ തിരിച്ചു വന്നതോടെ പുലിവാല് പിടിച്ച സുരേന്ദ്രന്‍ വീണ്ടും വെട്ടിലായി

നിയമസഭ തെരഞ്ഞെടുപ്പില്‍ വ്യാപകമായ കള്ളവോട്ട് നടന്നുവെന്ന് ചൂണ്ടിക്കാട്ടി നിയമയുദ്ധം നടത്തുന്ന ബിജെപി നേതാവ് കെ സുരേന്ദ്രനെതിരെ മാനനഷ്ട കേസുമായി വോട്ടര്‍മാര്‍.

സുരേന്ദ്രന്‍ ഹൈക്കോടതിയില്‍ സമര്‍പ്പിച്ച പട്ടികയില്‍ വിദേശത്ത് എന്ന് ആരോപിക്കപ്പെട്ട വോട്ടര്‍മാരാണ് ബിജെപി നേതാവിനെതിരെ കേസ് കൊടുക്കാന്‍ തീരുമാനിച്ചത്. സുരേന്ദ്രന്റെ പ്രസ്‌താവന നാണക്കേട് ഉണ്ടാക്കിയെന്നും സമൂഹം സംശയത്തോടെയാണ് കാണുന്നതെന്നും ചൂണ്ടിക്കാട്ടിയാണ് ഇവര്‍ നിയമപോരാട്ടത്തിനൊരുങ്ങുന്നത്.

മരിച്ചുപോയവരും വിദേശത്തുള്ളവരും മഞ്ചേശ്വരത്ത് കള്ളവോട്ട് ചെയ്‌തുവെന്നാണ് സുരേന്ദ്രന്‍ ആരോപിക്കുന്നത്.

കള്ളവോട്ട് ആരോപിച്ചു സമന്‍സ് അയച്ച അഞ്ചുപേരില്‍ മൂന്നുപേരും ഇത് കൈപ്പറ്റുകയും മരിച്ചുവെന്ന് സുരേന്ദ്രന്‍ ചൂണ്ടിക്കാട്ടിയ മഞ്ച്വേരം മണ്ഡലത്തിലെ മുപ്പത്തിയേഴാം ബൂത്തിലെ എണ്ണൂറാമത്തെ വോട്ടറായ അഹമ്മദ് കുഞ്ഞ്  കോടതിയില്‍ ഹാജരായി താന്‍ ജീവിച്ചിരുപ്പുണ്ടെന്ന് കോടതിയെ ബോധിപ്പിച്ചതുമാണ് ബിജെപി നേതാവിനെ വെട്ടിലാക്കിയത്.