'എന്നാ പിന്നെ അനുഭവിച്ചോ...' ഭര്‍തൃപീഡനം അറിയിക്കാന്‍ വിളിച്ച യുവതിയോട് വനിത കമ്മിഷന്‍ അധ്യക്ഷയുടെ മറുപടി, വിവാദം

പരാതിക്കാരിയോട് മോശം ഭാഷയില്‍ സംസാരിച്ച് സംസ്ഥാന വനിത കമ്മിഷന്‍ അധ്യക്ഷ എം.സി.ജോസഫൈന്‍. 'സ്ത്രീധനപീഡനം: വനിത കമ്മിഷനോട് സഹായം തേടാം' എന്ന പരിപാടിയിലേക്ക് വിളിച്ച യുവതിയോടാണ് ജോസഫൈന്‍ പുച്ഛഭാവത്തോടെ സംസാരിച്ചത്. ഭര്‍ത്താവും ഭര്‍ത്താവിന്റെ വീട്ടുകാരം സ്ത്രീധനവുമായി ബന്ധപ്പെട്ട് തന്നെ പീഡിപ്പിക്കുന്ന വിവരം പങ്കുവച്ച യുവതിയോട് എന്തുകൊണ്ട് ഇതുവരെ പൊലീസില്‍ ഇക്കാര്യം അറിയിച്ചില്ലെന്ന് ജോസഫൈന്‍ ചോദിക്കുന്നുണ്ട്. പൊലീസില്‍ അറിയിച്ചില്ലെന്ന് യുവതി പറഞ്ഞപ്പോള്‍ 'എന്നാ പിന്നെ അനുഭവിച്ചോ...' എന്ന മറുപടിയാണ് ജോസഫൈന്‍ നല്‍കുന്നത്. പരാതി പറയാന്‍ വിളിക്കുന്നവരോട് അല്‍പ്പം കൂടി മര്യാദയിലും സമാധാനത്തോടെയും സംസാരിച്ചുകൂടെ എന്നാണ് വിമര്‍ശനം. അതിനുശേഷം നല്ല അഭിഭാഷകന്‍ മുഖേനയും കുടുംബ കോടതി വഴിയും നിയമപരമായി നേരിടാന്‍ ഈ യുവതിക്ക് ജോസഫൈന്‍ നിര്‍ദേശം നല്‍കുന്നുണ്ട്.