ഗൃഹനാഥൻ വീട്ടിനുള്ളിൽ മരിച്ച നിലയിൽ : മകനെ പോലീസ് അറസ്റ്റ് ചെയ്തു

കൊല്ലം : ഗൃഹനാഥനെ വീട്ടിനുള്ളിൽ മരിച്ച നിലയിലും ഭാര്യയെ പരുക്കേറ്റ നിലയിലും കണ്ടെത്തിയ സംഭവത്തിൽ മകനെ പോലീസ് അറസ്റ്റ് ചെയ്തു. അന്വേഷണത്തിൽ പിതാവിനെ തലയ്ക്കടിച്ചു കൊലപ്പെടുത്തിയ സംഭവത്തിലാണ് മകൻ ആശാ കൃഷ്ണൻ (39) പോലീസ് പിടിയിലായത്.

വവ്വാക്കാവ് ഓട്ടോ സ്റ്റാൻഡിലെ ഓട്ടോ ഡ്രൈവർ കുലശേഖരപുരം കോട്ടയ്ക്കുപുറം കൃഷ്ണ ഭവനിൽ കൃഷ്ണൻ കുട്ടി നായർ എന്ന 72 കാരനെയാണ് വീട്ടിനുള്ളിൽ മരിച്ച നിലയിൽ കണ്ടെത്തിയത്. ഇദ്ദേഹത്തിന്റെ ഭാര്യ ശ്യാമള പരുക്കേറ്റ നിലയിലുമായിരുന്നു. കഴിഞ്ഞ ദിവസം രാവിലെ ഒമ്പതരയോടെ ഒരു ബന്ധു വീട്ടിലെത്തിയപ്പോഴാണ് സംഭവം പുറത്തറിയുന്നത്. കരുനാഗപ്പള്ളി സി.ഐ വി.ബിജുവിന്റെ നേതൃത്വത്തിലുള്ള പോലീസ് സ്ഥലത്തെത്തി പരിശോധനകൾ നടത്തുകയും ആശാ കൃഷ്ണനെ അറസ്റ്റ് ചെയ്യുകയുമായിരുന്നു.

ആശാ കൃഷ്ണൻ സ്ഥിരമായി മദ്യപിച്ചെത്തി വീട്ടിൽ വഴക്കുണ്ടാക്കുകയും മാതാപിതാക്കളെ മദ്യപിക്കുന്നതും പതിവാണ്. ഇയാളുടെ ഈ സ്വഭാവം കാരണം ഭാര്യ പിണങ്ങി രണ്ടു കുട്ടികളുമായി സ്വന്തം വീട്ടിലാണ് താമസം. ബഹളം നടന്നത് അയൽക്കാർ അറിഞ്ഞെങ്കിലും ഇത് സ്ഥിരമായതിനാൽ ആരും എത്തിയില്ല. ഇതിനൊപ്പം ഇയാൾ സഹോദരിയെ വിളിച്ചു പിതാവ് മരിച്ചു കിടക്കുന്നതായി പറയുകയും ചെയ്തു. അവരും ഇയാളുടെ സ്വഭാവം കാരണം ഇത് കാര്യമാക്കിയിരുന്നില്ല.