UDF: അന്‍വറിനെ ഒപ്പം നിര്‍ത്താന്‍ പരിശ്രമം തുടരണം; കോണ്‍ഗ്രസിനോടു ലീഗ്

അന്‍വറിനെ അടഞ്ഞ അധ്യായമായി കാണേണ്ടതില്ല

UDF: പി.വി.അന്‍വറിനെ ഒപ്പം നിര്‍ത്താന്‍ ശ്രമങ്ങള്‍ തുടരണമെന്ന് മുസ്ലിം ലീഗ്. അന്‍വറിനെ പൂര്‍ണമായി തള്ളുന്നത് ഭാവിയില്‍ ദോഷം ചെയ്‌തേക്കുമെന്നാണ് ലീഗിനുള്ളിലെ അഭിപ്രായം. തദ്ദേശ തിരഞ്ഞെടുപ്പിനു മുന്‍പ് അന്‍വറിന്റെ കാര്യത്തില്‍ തീരുമാനമെടുക്കണമെന്നും ലീഗ് നേതൃത്വം കോണ്‍ഗ്രസിനോടു ആവശ്യപ്പെട്ടിട്ടുണ്ട്. 

അന്‍വറിനെ അടഞ്ഞ അധ്യായമായി കാണേണ്ടതില്ല. പ്രാദേശികമായി അന്‍വറിനുള്ള പിന്തുണ തദ്ദേശ തിരഞ്ഞെടുപ്പില്‍ യുഡിഎഫിനു ഗുണം ചെയ്യും. ഇടതുവിരുദ്ധ വോട്ടുകള്‍ ഏകീകരിക്കണമെങ്കില്‍ അന്‍വര്‍ ഒപ്പം വേണം. അതിനാല്‍ മുന്നണി നേതൃത്വം മുന്‍കൈ എടുത്ത് അന്‍വറിനെ ഒപ്പം നിര്‍ത്താനുള്ള പരിശ്രമങ്ങള്‍ തുടരണമെന്നുമാണ് ലീഗിന്റെ നിലപാട്. 

ലീഗ് നേതൃത്വം അന്‍വറുമായി രഹസ്യ ചര്‍ച്ചകള്‍ നടത്താന്‍ സാധ്യതയുണ്ട്. പ്രതിപക്ഷ നേതാവ് വി.ഡി.സതീശന്റെ അനുമതിയോടെയായിരിക്കും ഇത്. അതേസമയം അന്‍വറിനെ മുന്നണിയിലെടുക്കുന്നത് തദ്ദേശ തിരഞ്ഞെടുപ്പിനു തൊട്ടുമുന്‍പ് മതിയെന്നാണ് സതീശന്റെ നിലപാട്. 

അതേസമയം കോണ്‍ഗ്രസ് പ്രവര്‍ത്തകര്‍ക്കിടയില്‍ അന്‍വറിനെ മുന്നണിയിലെടുക്കുന്നതിനെ ചൊല്ലി രണ്ട് നിലപാടുണ്ട്. പ്രതിപക്ഷ നേതാവ് വി.ഡി.സതീശനെതിരെ അന്‍വര്‍ നടത്തിയ പരാമര്‍ശങ്ങള്‍ ചൂണ്ടിക്കാട്ടിയാണ് കോണ്‍ഗ്രസ് അനുയായികള്‍ ഒരു വിഭാഗം വിയോജിപ്പ് പരസ്യമാക്കിയത്. 'വായില്‍ തോന്നിയത് കോതയ്ക്കു പാട്ട്' എന്ന രീതിയാണ് അന്‍വറിന്റേത്. കെട്ടുറപ്പോടെ മുന്നോട്ടുപോകുന്ന മുന്നണിയിലേക്ക് അന്‍വര്‍ എത്തിയാല്‍ കാര്യങ്ങള്‍ അവതാളത്തിലാകും. തോന്നുമ്പോഴൊക്കെ രാഷ്ട്രീയ നിലപാട് മാറ്റുന്ന അന്‍വര്‍ മുന്നണിയില്‍ തലവേദന സൃഷ്ടിക്കുമെന്നും കോണ്‍ഗ്രസ് അനുഭാവികള്‍ പറയുന്നു.