Pocso Case:പാലക്കാട് നിന്ന് കാണാതായ പോക്സോ കേസ് ഇരയെ ഗുരുവായൂരിൽ നിന്ന് കണ്ടെത്തി, ബന്ധുവിനെ കേസിൽ നിന്ന് രക്ഷിക്കാൻ കുട്ടിയെ കടത്തിയത് മാതാപിതാക്കൾ

പാലക്കാട് നിന്ന് കാണാതായ പോക്സോ കേസ് അതിജീവിതയെ ഗുരുവായൂരിൽ നിന്ന് മാതാപിതാക്കൾക്കൊപ്പം കണ്ടെത്തി. പതിനൊന്നുകാരിയായ പെൺകുട്ടിയെ മൊഴിമാറ്റിക്കുന്നതിൻ്റെ ഭാഗമായാണ് മാതാപിതാക്കൾ ഉൾപ്പടെയുള്ളവർ തട്ടിക്കൊണ്ടുപോയതെന്നാണ് വിവരം.

പാലക്കാട് നിന്നുള്ള പ്രത്യേക പോലീസ് സംഘമാണ് ഗുരുവായൂരിനടുത്തുള്ള ലോഡ്ജിൽ വെച്ച് പെൺകുട്ടിയെ കണ്ടെത്തിയത്. കുട്ടിയുടെ അടുത്ത ബന്ധുക്കളാണ് പോക്സോ കേസിലെ പ്രതികൾ. ഒരു വർഷം മുൻപാണ് കേസിനാസ്പദമായ സംഭവം നടന്നത്. കേസിൻ്റെ വിചാരണ ഈ മാസം 16ന് ആരംഭിക്കാനിരിക്കെയാണ് മൊഴിമാറ്റുന്നതിനായി മാതാപിതാക്കൾ പെൺകുട്ടിയെ കടത്തിയത്.

മാതാപിതാക്കൾക്കൊപ്പം പോകാൻ താത്പര്യമില്ലെന്ന് നേരത്തെ കുട്ടി കോടതിയിൽ മൊഴി നൽകിയിരുന്നു. തുടർന്ന് മുത്തശ്ശിയുടെ സംരക്ഷണയിലാണ് കുട്ടി കഴിഞ്ഞിരുന്നത്. പ്രതികൾക്കൊപ്പമുള്ള നിലപാടായിരുന്നു കേസിൽ മാതാപിതാക്കൾ സ്വീകരിച്ചത്. അതിനാൽ കുട്ടിയുടെ സംരക്ഷണചുമതല മാതാപിതാക്കൾക്ക് ഒരു ഘട്ടത്തിലും ഉണ്ടായിരുന്നില്ല.