പുനലൂര്‍: നാട്ടുകാരുടെ വിശ്വാസം ആര്‍ജ്ജിച്ച ശേഷം മികച്ച നിരക്കില്‍ പലിശ നല്കാമെന്നുള്ള വാഗ്ദാനത്തോടെ ലക്ഷക്കണക്കിന് രൂപ വാങ്ങിയെടുത്ത ശേഷം ജൂവലറി ഉടമ മുങ്ങിയതായി റിപ്പോര്‍ട്ട്. പുനലൂരിലെ പ്രധാന ജൂവലറികളില്‍ ഒന്നായ പവിത്രം ജ്വല്ലേഴ്സ് ഉടമ പുനലൂര്‍ സ്വദേശി സാബു എന്നറിയപ്പെടുന്ന ടി.സാമുവേല്‍ ആണ് മുങ്ങിയത്.
കഴിഞ്ഞ വ്യാഴാഴ്ച മുതല്‍ സ്ഥാപനം തുറക്കാതായതോടെ പണം നിക്ഷേപിച്ചവര്‍ കടയ്ക്കു മുന്നിലെത്തി. എന്നാല്‍ പ്രശനം ഗുരുതരം ആകുമെന്നറിഞ്ഞു ഉടമ തിങ്കളാഴ്ച സ്ഥാപനം തുറക്കുമെന്ന് കടയ്ക്കു മുന്നില്‍ നോട്ടീസ് പതിച്ചു. എന്നാല്‍ കട അന്നും തുറന്നില്ല.
തുടര്‍ന്ന് നിക്ഷേപകര്‍ ഒത്തുകൂടി പോലീസില്‍ പരാതി നല്‍കി. കേസെടുത്തു അന്വേഷണം ആരംഭിച്ചതായി പുനലൂര്‍ എസ്.എച്ച്.ഓ ജെ.രാകേഷ് വെളിപ്പെടുത്തി. സ്വര്‍ണ്ണച്ചിട്ടി, നിക്ഷേപം എന്നീ നിലകളില്‍ മുപ്പതോളം പേരില്‍ നിന്ന് കോടികളാണ് പിരിച്ചെടുത്തതെന്ന് സൂചനയുണ്ട്. കട പൂട്ടുന്നതിനു മുമ്പായി ഇവിടെയുണ്ടായിരുന്ന സ്വര്‍ണ്ണം മുഴുവന്‍ മാറ്റിയതായി പോലീസ് വെളിപ്പെടുത്തി.