വിദ്യാഭ്യാസ മേഖലയില്‍ കേന്ദ്ര നയം അടിച്ചേല്‍പ്പിക്കുന്നു: പിണറായി വിജയന്‍

ബിജെപി സര്‍ക്കാര്‍ ന്യൂനപക്ഷങ്ങളെ രണ്ടാം നിര പൗരന്മാരായി കാണുന്നു

വിദ്യാഭ്യാസ മേഖലയില്‍ കേന്ദ്ര സര്‍ക്കാര്‍ നയം അടിച്ചേല്‍പ്പിക്കുകയാണെന്ന് മുഖ്യമന്ത്രി പിണറായി വിജയന്‍. യുജിസിയെ ഉപയോഗിച്ച് ബിജെപി വിദ്യാഭ്യാസ മേഖലയില്‍ കാര്യമായ ഇടപെടല്‍ നടത്തുകയാണെന്നും പിണറായി വിമര്‍ശിച്ചു. സിപിഎം കോഴിക്കോട് ജില്ലാ സമ്മേളന വേദിയില്‍ സംസാരിക്കുകയായിരുന്നു അദ്ദേഹം. 

' ഫെഡറല്‍ സംവിധാനം തകര്‍ത്താല്‍ സംസ്ഥാനങ്ങളുടെ അധികാരം ഇല്ലാതാക്കാമെന്ന് കേന്ദ്രം കാണുന്നു. സര്‍വകലാശാലകളുടെ നിയന്ത്രണം ഏറ്റെടുക്കാനാണ് യുജിസി സംവിധാനത്തില്‍ കേന്ദ്ര സര്‍ക്കാര്‍ മാറ്റങ്ങള്‍ വരുത്തുന്നത്. രാജ്യത്തെ കാവിവത്കരിക്കാനുള്ള അജണ്ട കേന്ദ്രം മുന്നോട്ടുവയ്ക്കുന്നു,' പിണറായി വിമര്‍ശിച്ചു. 

ബിജെപി സര്‍ക്കാര്‍ ന്യൂനപക്ഷങ്ങളെ രണ്ടാം നിര പൗരന്മാരായി കാണുന്നു. ദളിതര്‍ക്കും സ്ത്രീകള്‍ക്കുമെതിരെ രാജ്യത്ത് ആക്രമണങ്ങള്‍ വര്‍ധിക്കുകയാണെന്നും പിണറായി പറഞ്ഞു.