പ്രമുഖ നടിമാര്‍ ആരൊക്കെയെന്ന് വെളിപ്പെടുത്താന്‍ ആകില്ല: ഫെനി ബാലകൃഷ്ണന്‍

ദിലീപ് പറഞ്ഞു, പൊലീസ് ചോദ്യം ചെയ്തു: ഫെനി

കൊച്ചിയില്‍ പ്രമുഖ നടി ആക്രമിക്കപ്പെട്ട സംഭവവുമായി ബന്ധപ്പെട്ട് പ്രമുഖ നടിമാരുടെ പേര് പറയാന്‍ തനിക്ക് കഴിയില്ലെന്നും സമ്മര്‍ദ്ദമുണ്ടെന്നും അഭിഭാഷകന്‍ ഫെനി ബാലകൃഷ്ണന് മാധ്യമങ്ങളോട് വ്യക്തമാക്കി‍.രണ്ട് ദിവസമായി പലരും തന്നെ വിളിച്ച് ഇതിനായി സമ്മര്‍ദ്ദം ചെലുത്തുകയാണ്. എന്നാല്‍ പേര് പറയാന്‍ താന്‍ ഒരുക്കമല്ലെന്നും ഫെനി പറഞ്ഞു.

ആലുവ പൊലീസ് ക്ലബ്ബില്‍ പൊലീസിന്റെ ചോദ്യം ചെയ്യലിന് ശേഷം മാധ്യമങ്ങളോട് പ്രതികരിക്കുകയായിരുന്നു ഫെനി. ദിലീപ് പറഞ്ഞ കാര്യങ്ങളുടെ വ്യക്തമായ വിവരണം അറിയാനാണ് പൊലീസ് തന്റെ മൊഴിയെടുത്തതെന്നും ഫെനി വെളിപ്പെടുത്തി. തന്നെ കാണാന്‍ വന്ന ആളുകളെന്ന് സംശയിക്കുന്ന ചിലരുടെ ഫോട്ടോകള്‍ പൊലീസ് കാണിച്ചു. ഒരാളെ ഏകദേശം തിരിച്ചറിഞ്ഞെന്നും ഫെനി ബാലകൃഷ്ണന്‍ പറഞ്ഞു.

നടി ആക്രമിക്കപ്പെട്ട കേസില്‍ ഗൂഡാലോചന നടക്കുന്നെന്ന് ഫെനി ബാലകൃഷ്ണന്‍ പറഞ്ഞതായി ദിലീപ് ആരോപിച്ചിരുന്നു. ദിലാപിന്റെ പരാതിയിലാണ് ഫെനി ബാലകൃഷ്ണനെ പൊലീസ് ചോദ്യം ചെയ്തത്. ഫെനി മൂന്നു തവണ വിളിച്ചിട്ടുണ്ടെന്നാണ് ദിലീപ് കഴിഞ്ഞതവണ നടന്ന ചോദ്യം ചെയ്യലില്‍ പൊലീസിനോട് പറഞ്ഞത്.

കോടതിയില്‍ കീഴടങ്ങുന്നതിന് പള്‍സര്‍ സുനി സമീപിച്ചതായി ഫെനി ബാലകൃഷ്ണന്‍ പറഞ്ഞു. മഹേഷ്, മനോജ് എന്നീ സുനിയുടെ രണ്ട് സുഹൃത്തുക്കളാണ് കീഴടങ്ങുന്നതിനായി സമീപിച്ചതെന്നും അദ്ദേഹം വെളിപ്പെടുത്തി. ചെങ്ങന്നൂരില്‍ വെച്ചായിരുന്നു കൂടിക്കാഴ്ചയെന്നും ഫെനി പറഞ്ഞു.