വയനാട് എംപി രാഹുല്‍ ഗാന്ധിയുടെ ഓഫീസിലെ ഗാന്ധിചിത്രം തകര്‍ത്തത് എസ്എഫ്‌ഐക്കാര്‍ പോയ ശേഷമെന്ന് പൊലീസ് റിപ്പോര്‍ട്ട്. ഫൊട്ടോകള്‍ തെളിവായി ഉള്‍പ്പെടുത്തിയാണ് പൊലീസിന്റെ റിപ്പോര്‍ട്ട്. എസ്എഫ്‌ഐക്കാര്‍ രാഹുല്‍ ഗാന്ധിയുടെ കസേരയില്‍ വാഴവെച്ച ശേഷം പുറത്തിറങ്ങിയപ്പോള്‍ ഉള്ള ചിത്രം പൊലീസ് പകര്‍ത്തിയിട്ടുണ്ട്. ഈ ചിത്രത്തില്‍ ഗാന്ധി ചിത്രം ചുമരില്‍ തന്നെ ഇരിക്കുന്നുണ്ട്. എന്നാല്‍ കുറച്ച് കഴിഞ്ഞ് യുഡിഎഫ് പ്രവര്‍ത്തകര്‍ കയറിയിറങ്ങിയ ശേഷം പകര്‍ത്തിയ ചിത്രത്തില്‍ ഗാന്ധിചിത്രം നിലത്ത് വീണു കിടക്കുന്നുണ്ട്. ഈ ചിത്രങ്ങളാണ് പൊലീസ് റിപ്പോര്‍ട്ടില്‍ നല്‍കിയിരിക്കുന്നത്.