ആര്‍.എസ്.പി. ഇടതുമുന്നണിയിലേക്ക്? അഭ്യൂഹങ്ങള്‍ക്ക് മറുപടി നല്‍കി ഷിബു ബേബി ജോണ്‍

സംഘടനാ പ്രവര്‍ത്തനത്തിനു സമയം കിട്ടുന്നില്ല എന്ന കാരണത്താലാണ് പാര്‍ട്ടിയില്‍ നിന്ന് അവധിയെടുത്തതെന്ന് ആര്‍.എസ്.പി. നേതാവ് ഷിബു ബേബി ജോണ്‍. ഇടതുപക്ഷവുമായി സഹകരിച്ചു പ്രവര്‍ത്തിക്കും എന്ന തരത്തിലുള്ള പ്രചാരണങ്ങളെയെല്ലാം അദ്ദേഹം തള്ളിക്കളഞ്ഞു. ഇടത് മുന്നണിയിലേക്ക് പോകുന്നതുമായി ബന്ധപ്പെട്ട് യാതൊരു ചര്‍ച്ചകളും ആലോചനകളും നടന്നിട്ടില്ലെന്ന് ഷിബു ബേബി ജോണ്‍ വെബ് ദുനിയ മലയാളത്തോട് പറഞ്ഞു. തിരഞ്ഞെടുപ്പ് തോല്‍വിയെ കുറിച്ച് പാര്‍ട്ടി നേതൃത്വം ചര്‍ച്ച ചെയ്യും. യുഡിഎഫിന്റെ തോല്‍വിക്ക് കാരണം നേതൃപാഠവത്തിന്റെ പോരായ്മയാണോ അതോ മറ്റേതെങ്കിലും ഘടകങ്ങളാണോ എന്നുള്ളത് തിരഞ്ഞെടുപ്പ് ഫലം വിലയിരുത്തുമ്പോഴേ പറയാന്‍ സാധിക്കൂ. കേരളത്തിലെ രാഷ്ട്രീയം തന്നെ മാറിപ്പോയതിന്റെ സാഹചര്യം കൂടിയാണ് ഇങ്ങനെയൊരു തിരഞ്ഞെടുപ്പ് ഫലത്തിനു കാരണമെന്നും അദ്ദേഹം കൂട്ടിച്ചേര്‍ത്തു.