കാസർകോട് ചെറുവത്തൂരിൽ പരിശോധനയ്ക്കയച്ച 30ൽ 24 സാമ്പിളുകളിലും ഷിഗെല്ല സാന്നിധ്യം

കാസർകോട് ചെറുവത്തൂരിൽ ഭക്ഷ്യവകുപ്പ് ശേഖരിച്ച മിക്ക കുടിവെള്ള സാമ്പിളുകളിലും ഷിഗെല്ല ബാക്‌ടീരിയ സാന്നിധ്യം കണ്ടെത്തിയതായി ആരോഗ്യവകുപ്പ്. പരിശോധനയ്ക്ക് അയച്ച 30 സാമ്പിളുകളില്‍ 24 എണ്ണത്തിലാണ് ബാക്‌ടീരിയ സാന്നിധ്യം. പഞ്ചായത്തിലെ മുഴുവന്‍ കുടിവെള്ള സ്രോതസുകള്‍ ക്ലോറിനേറ്റ് ചെയ്യാനാണ് തീരുമാനം.

അങ്കണവാടികള്‍, കുടിവെള്ള വിതരണ പദ്ധതികള്‍, ഗവണ്‍മെന്‍റ് ഓഫീസുകള്‍ എന്നിവയിലെ കുടിവെള്ള സാമ്പിളുകളും പരിശോധന നടത്തി ആവശ്യമായ നടപടികൾ സ്വീകരിക്കും. ഭക്ഷ്യ സുരക്ഷാ വകുപ്പ് ഇക്കഴിഞ്ഞ നാലാം തീയതി ചെറുവത്തൂരിലെ ഹോട്ടലുകള്‍ അടക്കമുള്ള ഭക്ഷ്യവില്‍പ്പന ശാലകളില്‍ നിന്ന് ശേഖരിച്ച ജല സാമ്പിളുകളിൽ ബാക്ടീരിയ സാന്നിധ്യം കണ്ടെ‌‌ത്തിയിരുന്നു. ഈ സാഹചര്യത്തിലാണ് കൂടുതൽ പരിശോധന നടത്താൻ ആരോഗ്യവകുപ്പ് തീരുമാനിച്ചത്.