കൊല്ലം: ഭര്‍തൃഗൃഹത്തില്‍ തൂങ്ങിമരിക്കാന്‍ ശ്രമിച്ച യുവതി പിന്നീട് ചികിത്സയിലിരിക്കെ മരിച്ചു. കൊല്ലം മര്ത്തടി കന്നിമേല്‍ക്കരി പുളിഞ്ചിക്കല്‍ വീട്ടില്‍ സതീഷിന്റെ ഭാര്യ അനുജ (22) ആണ് തിരുവനന്തപുരം മെഡിക്കല്‍ കോളേജ് ആശുപത്രിയില്‍ വച്ച് കഴിഞ്ഞ ദിവസം മരിച്ചത്. കഴിഞ്ഞ മാസം മുപ്പതാം തീയതിയാണ് അനുജയെ തൂങ്ങിയ നിലയില്‍ കണ്ടത്. ഉടന്‍ തന്നെ അനുജയെ കൊല്ലാതെ സ്വകാര്യ മെഡിക്കല്‍ കോളേജ് ആശുപത്രിയിലും പിന്നീട് തിരുവനന്തപുരം മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു.
ഭര്‍തൃ മാതാവിന്റെ പീഡനമാണ് മകളുടെ ആത്മഹത്യാ ശ്രമത്തിനു കാരണമെന്ന് അനുജയുടെ പിതാവ് അനില്‍ കുമാര്‍ ശക്തികുളങ്ങര പോലീസില്‍ പരാതി നല്‍കിയിരുന്നു. അനുജയുടെ ഭര്‍ത്താവ് സതീഷിന്റെ മാതാവ് സുനിജയ്ക്കെതിരെ പോലീസ് ഗാര്‍ഹിക പീഡനത്തിന് കേസെടുത്ത് അന്വേഷണം നടത്തുന്നുണ്ട്. കഴിഞ്ഞ ഡിസംബറിലായിരുന്നു സതീഷ് - അനുജ മാരുടെ വിവാഹം
ഭര്‍തൃ മാതാവ് സുനിജ തന്നോട് പലപ്പോഴും അപമര്യാദയായി പെരുമാറിയിട്ടുണ്ടെന്ന് അനുജ വീട്ടുകാരോട് പറഞ്ഞിരുന്നു. സംഭവം നടന്ന ദിവസം സതീഷും അനുജയും തമ്മില്‍ വാക്കു തര്‍ക്കമുണ്ടായി. തുടര്‍ന്ന് അനുജ മുറിയില്‍ കയറി കതകടച്ചു. എന്നാല്‍ രാത്രിയായിട്ടും കതക് തുറക്കാത്തതിനെ തുടര്‍ന്ന് ജനല്‍ വഴി നോക്കിയപ്പോഴാണ് അനുജയെ തൂങ്ങിയ നിലയില്‍ കണ്ടത്. ഉടന്‍ വാതില്‍ പൊളിച്ചാണ് അനുജയെ ആശുപത്രിയില്‍ പ്രവേശിപ്പിച്ചത്.