ഭവാനിപ്പുഴയുടെ കുത്തൊഴുക്കിൽപെട്ടു കാട്ടാനകൂട്ടം

ഭവാനിപ്പുഴയിൽ അടിയൊഴുക്കിൽ പെട്ട് കാട്ടാനക്കൂട്ടവും കാട്ടുപോത്തുകളും. പുഴയിലെ ഒഴുക്കിന്റെ തീവ്രത അറിയാതെ വെള്ളത്തിൽ മുങ്ങിയ കുട്ടിയാനയെ രക്ഷിക്കാൻ പുഴയിലേക്ക് അമ്മയാന എടുത്ത് ചാടുകയായിരുന്നു. 100 മീറ്ററോളം ദൂരം ഒഴുകി നീങ്ങിയെങ്കിലും കുട്ടിക്കൊമ്പനെ രക്ഷിക്കാൻ പിടിയാനയ്ക്ക് കഴിഞ്ഞു. ഇന്നലെയാണ് സംഭവം. 

ഇതിനു സമീപത്തു തന്നെയാണ്  കാട്ടുപോത്തുകൾ ഒഴുക്കിൽപെട്ടത്. ഇവ പിന്നീട് കരകയറി വനത്തിലേക്കു മടങ്ങുകയും ചെയ്തു. ചിലയിടങ്ങളിൽ പശുവും ഒഴുക്കിൽ പെട്ടു ദുരിതത്തിലായി. 

പലയിടങ്ങളിലും ഉരുൾപൊട്ടലും മണ്ണിടിച്ചിലും ഉണ്ടായതായി റിപ്പോർട്ടുകളുണ്ട്‌. വയനാട്ടിൽ ആറിടങ്ങളിൽ ഉരുൾപൊട്ടലുണ്ടായി. ആയിരങ്ങൾ ദുരിതാശ്വാസ ക്യാമ്പിലാണുള്ളത്. അട്ടപ്പാടി, പനമരം, പൂതാടി, നടവയൽ എന്നിവടങ്ങളിലാണ് വെള്ളപ്പൊക്കം രൂക്ഷമായത്. പല സ്ഥലങ്ങളും ഒറ്റപ്പെട്ട് കിടക്കുകയാണ്. 

ബുധനാഴ്ച രാത്രിമുതല്‍ നിലമ്പൂരിലും സമീപപ്രദേശങ്ങളിലും ശക്തമായ  മഴ പെയ്തിരുന്നു. കൂടാതെ വനമേഖലയില്‍ പലയിടത്തും ഉരുള്‍പൊട്ടലുമുണ്ടായി. ഇതിനെതുടര്‍ന്നാണ് നിലമ്പൂർ ടൌണിൽ വെള്ളപ്പൊക്കം ഉണ്ടായത്. 

ബംഗാള്‍ ഉള്‍ക്കടലില്‍ ന്യൂനമര്‍ദ്ദം രൂപപ്പെട്ടതിനാലാണ് സംസ്ഥാനത്ത് കനത്ത മഴ തുടരുന്നത്. ഇടുക്കി, മലപ്പുറം, കോഴിക്കോട് ജില്ലകളില്‍ ഇന്ന് അതി തീവ്രമഴ ലഭിക്കുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പുണ്ട്. ഈ ജില്ലകളില്‍ റെഡ് അലര്‍ട്ട് പ്രഖ്യാപിച്ചു. കോട്ടയത്തും വിദ്യാഭ്യാസ സ്ഥാപനങ്ങൾക്കും ഇന്ന് അവധി പ്രഖ്യാപിച്ചിട്ടുണ്ട്.

കാസര്‍കോട്, കോഴിക്കോട്, കണ്ണൂര്‍, മലപ്പുറം, ഇടുക്കി, വയനാട് എന്നീ ജില്ലകളിലെ പ്രൊഫഷണല്‍ കോളേജുകള്‍ ഉള്‍പ്പെടെ എല്ലാ വിദ്യാഭ്യാസ സ്ഥാപനങ്ങള്‍ക്കും ജില്ലാ കളക്ടര്‍മാര്‍ ഇന്ന് അവധി നല്‍കിയിട്ടുണ്ട്. പാലക്കാട് അട്ടപ്പാടി, ഷോളയൂര്‍, അഗളി എന്നിവിടങ്ങളില്‍ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചു.

വടക്കന്‍ കേരളത്തില്‍ ശക്തമായ മഴയെ തുടര്‍ന്ന് പുഴകള്‍ കരകവിഞ്ഞ് ഒഴുകുകയാണ്. കോഴിക്കോട് അമ്പായത്തോട് 32 കുടുംബങ്ങളിലെ 132 പേരെ ദുരിതാശ്വാസ ക്യാമ്പിലേക്ക് മാറ്റി. പലയിടത്തും മരം വീണ് ഗതാഗതം തടസപ്പെട്ടു. 

ഇരുവഴഞ്ഞിപ്പുഴ, ചാലിപ്പുഴ, ചാലിയാര്‍ എന്നിവ പലയിടത്തും കര കവിഞ്ഞു. ചാലിപ്പുഴ കരകവിഞ്ഞതോടെ ചെമ്പുകടവ്, പറപ്പറ്റ പാലങ്ങള്‍ വെള്ളത്തിനടയിലായി. നിരവധി വീടുകളിലും വെള്ളം കയറി.