ബൈക്കിന് പിന്നാലെ തെരുവ് നായ ഓടി വന്നു; ഭയന്ന് വീണ വീട്ടമ്മ തലയിടിച്ച് മരിച്ചു

മകനൊപ്പം ബൈക്കിൽ സഞ്ചരിക്കവെ തെരുവ് നായ കുരച്ച് പുറകെ വരുന്നത് കണ്ട് ഭയന്ന് റോഡിൽ വീണ വീട്ടമ്മ മരിച്ചു. ബുധനാഴ്ച രാവിലെ 7.30 ഓടെ കാണിപ്പയ്യൂർ മാന്തോപ്പിലേക്ക് പോകുന്നതിനിടയിൽ കല്ലഴിക്കുന്ന് നരിമടയ്ക്ക് സമീപം വെച്ചായിരുനു അപകടം. അക്കിക്കാവ് ഇതുക്കരയിൽ ശങ്കുണ്ണിയുടെ ഭാര്യ ശകുന്തളയാണ് മരിച്ചത്. 

ജോലിസ്ഥലത്തേക്ക് മകനൊപ്പം ബൈക്കിൽ പോകുന്നതിനിടയിലാണ് നായയെ ഭയന്ന് ശകുന്തള റോഡിൽ തലയിടിച്ച് വീണത്. റോഡിൽ കിടക്കുകയായിരുന്ന തെരുവ് നായക്കൂട്ടം ബൈക്ക് വരുന്നത് കണ്ടതോടെ കുരയ്ക്കാൻ തുടങ്ങി. ഇതിൽ ഒരു നായ ബൈക്കിന് പിന്നാലെ ഓടുകയായിരുന്നു. 

നായ ഓടിവരുന്നത് കണ്ട ഭയത്തിൽ ബൈക്കിൽ നിന്ന് പിടിവിട്ടു പോയ ശകുന്തള റോഡിൽ വീണു. ഉടനെ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആദ്യം റോയൽ ആശുപത്രിയിലും പിന്നീട് അമല ആശുപത്രിയിലും പ്രവേശിപ്പിച്ചെങ്കിലും ബുധനാഴ്ച രാവിലെ പത്ത് മണിയോടെ മരിക്കുകയായിരുന്നു.