യത്തീംഖാനയിലെ പീഡനവിവരം പുറത്തുവന്നത് നാടകീയമായി; കുട്ടികളുടെ അശ്ലീല വീഡിയോകള്‍ പകര്‍ത്തി, നടന്നത് ക്രൂരമായ ചെയ്‌തികള്‍ - റിപ്പോര്‍ട്ട് പുറത്ത്

പീഡനത്തിനിടെ യത്തീംഖാനയിലെ കുട്ടികളുടെ അശ്ലീല വീഡിയോകള്‍ പകര്‍ത്തി

യത്തീംഖാനയിലെ പ്രായപൂർത്തിയാകാത്ത ആറ് പെൺകുട്ടികളെ പീഡിപ്പിച്ച കേസിൽ ആറ്​ പ്രതികളുടെ അറസ്​റ്റ്​ രേഖപ്പെടുത്തിയതായി ഡിവൈഎസ്​പി മുഹമ്മദ്​ ഷാഫി. അറസ്​റ്റിലായ പ്രതികളുടെ വിവരങ്ങൾ തിരിച്ചറിയൽ പരേഡിനുശേഷമേ വെളിപ്പെടുത്തൂവെന്നും അദ്ദേഹം വ്യക്തമാക്കി.

കല്‍പ്പറ്റ പൊലീസിന് ലഭിച്ച പരാതിയെ തുടര്‍ന്നാണ് യത്തീംഖാനയ്ക്ക് സമീപമുളള കടകളിലെ യുവാക്കളെ പൊലീസ് കസ്റ്റഡിയില്‍ എടുത്തത്. ഹോസ്റ്റലിലേക്ക് പോകുംവഴി കടയിലേക്ക് വിളിച്ചു വരുത്തിയായിരുന്നു പ്രായപൂര്‍ത്തിയാകാത്ത പെണ്‍കുട്ടികളെ ക്രൂരമായി പീഡിപ്പിച്ചത്.

പ്രായപൂര്‍ത്തിയാകാത്ത ആറ് സ്‌കൂള്‍ വിദ്യാര്‍ത്ഥിനികളെ കോമ്പൗണ്ടിന് പുറത്തുവെച്ച് മിഠായി നല്‍കിയും അശ്ലീല വീഡിയോകള്‍ കാണിച്ച് പ്രലോഭിപ്പിക്കുകയും പീഡിപ്പിക്കുകയും ചെയ്തുവെന്നാണ് യത്തീംഖാന നല്‍കിയ പരാതിയില്‍ വിശദമാക്കുന്നത്.

പെൺകുട്ടികളുടെ പെരുമാറ്റത്തില്‍ സംശയം തോന്നിയ യത്തീംഖാനയിലെ സെക്യൂരിറ്റി ജീവനക്കാരൻ ഓഫീസിൽ വിവരമറിയിക്കുകയായിരുന്നു. തുടർന്ന്​ പെൺകുട്ടികളെ കൗൺസിലിങ്ങിന്​ വിധേയരാക്കിയപ്പോഴാണ്​ പീഡനവിവരം പുറത്തറിഞ്ഞത്​. ഏഴിലും എട്ടിലും പഠിക്കുന്ന കുട്ടികളാണ് പീഡനത്തിന് ഇരയായത്.