ദിലീപ് അങ്ങനെ ചെയ്തിട്ടുണ്ടെങ്കില്‍ അതിനു കാരണമുണ്ടാകും: വൈറലാകുന്ന സോനാ നായരുടെ വാക്കുകള്‍

‘അങ്ങനെ സംഭവിച്ചാല്‍ അവരെന്ത് ചെയ്യും?’ - അവള്‍ക്കും അവനുമൊപ്പം നിന്നുകൊണ്ട് സോന നായര്‍ ചോദിക്കുന്നു

കൊച്ചിയില്‍ യുവനടി ആക്രമിക്കപ്പെട്ടത് ഏറെ ചര്‍ച്ചയായ കാര്യമാണ്. സിനിമാമേഖലയിലെ എല്ലാവരും #അവള്‍ക്കൊപ്പം എന്ന് പ്രഖ്യാപിച്ചപ്പോള്‍ നടന്‍ ദിലീപും കൂട്ടത്തിലുണ്ടായിരുന്നു. കേസിലെ ഗൂഢാലോചനയുമായി ബന്ധപ്പെട്ട് ദിലീപിനെ അറസ്റ്റ് ചെയ്തതോടെ അവള്‍ക്കൊപ്പം എന്നത് #അവനൊപ്പം എന്നുമായി മാറി. 

ഇപ്പോഴിതാ, അവള്‍ക്കും അവനുമൊപ്പമല്ല, അവര്‍ക്കൊപ്പമാണെന്ന നിലപാടു വ്യക്തമാക്കി നടി സോനാ നായര്‍ രംഗത്തെത്തിയിരിക്കുന്നു. ദിലീപിനെ പൂര്‍ണമായും പിന്തുണയ്ക്കുന്ന സോനാ നായര്‍ ആക്രമിക്കപ്പെട്ട നടിക്കെതിരെ പരോക്ഷമായും ചില ആരോപണങ്ങള്‍ ഉന്നയിക്കുന്നുണ്ട്. 

പലരും കാര്യങ്ങള്‍ അറിയാതെയാണ് ദിലീപിനെതിരേ വിമര്‍ശനം ഉന്നയിക്കുന്നത്. കുറ്റാരോപിതന്‍ മാത്രമായ ഒരാളെ ഇപ്പോള്‍ ഒറ്റപ്പെടുത്തുന്നവര്‍ ഒരു കാലത്ത് അദ്ദേഹത്തിന്റെ കൂടെ കളിച്ചുചിരിച്ചു നടന്നവരാണ്. ആക്രമണത്തിന് ഇരയായ നടിയെ അടുത്ത പരിചയമുണ്ട്. അവളെ പിന്തുണച്ചുള്ള കൂട്ടായ്മകളിലും പങ്കെടുത്തിട്ടുണ്ട്. അതുകൊണ്ട് തന്നെ ദിലീപ് കേസില്‍ പ്രതിയാകരുതേ എന്ന് പ്രാര്‍ഥിച്ചിരുന്നു.

ഇനി ദിലീപ് അങ്ങനെ ചെയ്തിട്ടുണ്ടെങ്കില്‍ അതിന് പിന്നില്‍ ശക്തമായ ഒരു കാരണം ഉണ്ടാകില്ലേ എന്നും സോന നായര്‍ ചോദിക്കുന്നുണ്ട്. ഇങ്ങനെയെല്ലാം ചിന്തിക്കുന്നിടത്താണ് ആരുടെയൊപ്പം നില്‍ക്കണമെന്ന കാര്യത്തില്‍ സംശയം ഉണ്ടാകുന്നതെന്നും സോന പറഞ്ഞതായി ചില ഓണ്‍ലൈന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു.