നടി ആക്രമിക്കപ്പെട്ട കേസ്: മുകേഷിനെയും പൊലീസ് ചോദ്യം ചെയ്യും

നടിയുടെ കേസില്‍ മുകേഷിനും ബന്ധമോ?

കൊച്ചിയില്‍ നടി ആക്രമിക്കപ്പെട്ട കേസില്‍ നടൻ മുകേഷിനെയും പൊലീസ് ചോദ്യം ചെയ്യും. സംഭവത്തിൽ ഗൂഢാലോചന നടന്ന സമയത്ത് മുഖ്യപ്രതി പള്‍സര്‍ സുനി മുകേഷിന്റെ ഡ്രൈവർ ആയിരുന്നു. ഇതേ തുടര്‍ന്നാണ് മുകേഷിനെ പൊലീസ് ചോദ്യം ചെയ്യാന്‍ തീരുമാനിച്ചത്.

ദിലീപ് നായകനായ 'സൗണ്ട് തോമ' ‌എന്ന സിനിമയുടെ ഷൂട്ടിങ് സമയത്ത് പള്‍സര്‍ സുനി മുകേഷിന്റെ ഡ്രൈവറായിരുന്നു. ഇതിനുപുറമേ അമ്മ ഷോയുടെ സമയത്ത് മുകേഷിന്റെ ഡ്രൈവറായിട്ട് സുനി എത്തിയിരുന്നു. ഒരു വര്‍ഷം തന്റെ ഡ്രൈവറായി പ്രവര്‍ത്തിച്ച പള്‍സര്‍ സുനി ക്രിമിനല്‍ പശ്ചാത്തലമുള്ള ആളാണെന്ന് അറിയില്ലായിരുവെന്ന് മുകേഷ് പറഞ്ഞിരുന്നു.

അമിത വേഗതയില്‍ വണ്ടിയോടിക്കുന്നതിനാലാണ് സുനിയെ ജോലിയില്‍ നിന്ന് പറഞ്ഞുവിട്ടത്. താന്‍ സുനിയുമായി സൌഹാര്‍ദ്ദമായിട്ടാണ് പിരിഞ്ഞതെന്ന് മുകേഷ് പറഞ്ഞിരുന്നു. നടിയുടെ കേസുമായി ബന്ധപ്പെട്ട് ഇന്നലെ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം.