റിമി ടോമിയെ പൊലീസിനു ഇപ്പോഴും സംശയമോ? റിമിയുടെ രഹസ്യമൊഴി രേഖപ്പെടുത്തും

നടിയെ ആക്രമിച്ച കേസ്; റിമി ടോമിയുടെ രഹസ്യമൊഴി രേഖപ്പെടുത്തും

നടിയെ ആക്രമിച്ച കേസുമായി ബന്ധപ്പെട്ട് ഗായിക റിമി ടോമിയുടെ രഹസ്യമൊഴി രേഖപ്പെടുത്തണമെന്ന് ആവശ്യപ്പെട്ട് അന്വേഷണസംഘം കോടതിയില്‍ അപേക്ഷ നല്‍കി. 164ആം വകുപ്പ് പ്രകാരമാണ് അപേക്ഷ. റിമി ഉള്‍പ്പെടെ നാല്‍ സിനിമാക്കാരുടെ മൊഴി രേഖപ്പെടുത്താന്‍ അനുവദിക്കണമെന്നാണ് അപേക്ഷയില്‍ പറയുന്നത്.

അങ്കമാലി മജിസ്‌ട്രേറ്റ് കോടതിയിലാണ് ഇതുപ്രകാരമുള്ള അപേക്ഷ നല്‍കിയിരിക്കുന്നത്. ഹൈക്കോടതിയില്‍ ദിലീപ് നല്‍കിയ ജാമ്യാപേക്ഷയെ തുടര്‍ന്നുള്ള വാദത്തിലും ഇക്കാര്യം പ്രോസിക്യൂഷന്‍ ചൂണ്ടിക്കാട്ടിയിരുന്നു.

ദിലീപ് അറസ്റ്റിലായി 90 ദിവസം പൂര്‍ത്തിയാവുന്നത് അടുത്തമാസം ഏഴാം തീയ്യതിയാണ്. അതിനുള്ളില്‍ കുറ്റപത്രം സമര്‍പ്പിക്കാനുള്ള തയ്യാറെടുപ്പിലാണ് പൊലീസ്. ദിലീപിനെ കുടുക്കാനുള്ള തെളിവുകള്‍ അന്വേഷണ സംഘത്തിന്റെ പക്കല്‍ ഉണ്ടെന്ന് പ്രോസിക്യൂഷന്‍ വാദിച്ചു. അതേസമയം ദിലീപിന്റെ പുതിയ ജാമ്യാപേക്ഷയില്‍ വിധി പറയാന്‍ മാറ്റിവച്ചിരിക്കുകയാണ് ഹൈക്കോടതി.