‘മാഡം’ സിനിമാമേഖലയിലെ പ്രശസ്ത; ആഗസ്റ്റ് 16ന് ആ പേര് വെളിപ്പെടുത്തും - പള്‍സര്‍ സുനി

‘മാഡം’ സിനിമാമേഖലയില്‍ സജീവമാണെന്ന് പള്‍സര്‍ സുനി

കൊച്ചിയില്‍ യുവനടിയെ തട്ടിക്കൊണ്ടുപോയി ആക്രമിച്ച കേസിലെ ‘മാഡം’ സിനിമാരംഗത്ത് പല മേഖലകളിലും സജീവമായി നില്‍ക്കുന്നയാളാണെന്ന് കേസിലെ മുഖ്യപ്രതിയായ പള്‍സര്‍ സുനി. ആഗസ്റ്റ് പതിനാറാം തിയതി ആരാണ് ആ മാഡമെന്ന് താന്‍ വെളിപ്പെടുത്തുമെന്നും സുനി വ്യക്തമാക്കി. 

‘മാഡം’ എന്നത് വെറുമൊരു കെട്ടുകഥയല്ലെന്ന് നേരത്തെതന്നെ സുനി പറഞ്ഞിരുന്നു. ഈ കേസില്‍ ഉള്‍പ്പെട്ട് ജയിലില്‍ കഴിയുന്ന വിഐപി ഈ മാസം 16നകം എല്ലാ കാര്യങ്ങളും പറഞ്ഞില്ലെങ്കില്‍ താന്‍ തന്നെ എല്ലാം തുറന്നുപറയുമെന്നും സുനി പറഞ്ഞു.

അതേസമയം , ഈ കേസുമായി ബന്ധപ്പെട്ട് നിലവിലുള്ള സാഹചര്യങ്ങളെല്ലാം മഞ്ജുവിന് എതിരാണെന്നാണ് പുറത്തുവരുന്ന റിപ്പോര്‍ട്ട്. ഹൈക്കോടതിയില്‍ സമര്‍പ്പിച്ചിരിക്കുന്ന പുതിയ ജാമ്യ ഹര്‍ജിയില്‍ മഞ്ജുവിനെതിരെ ഗുരുതര ആരോപണങ്ങളാണ് ദിലീപ് ഉന്നയിച്ചിരിക്കുന്നത്. 

മഞ്ജുവും എഡിജിപി ബി സന്ധ്യയും തമ്മിലുള്ള അടുപ്പമാണ് തന്നെ ഈ കേസില്‍ കുടുക്കിയതെന്ന് ദിലീപ് വ്യക്തമായി പറയുന്നുണ്ട്. ഈ ആരോപണങ്ങള്‍ മഞ്ജുവിനെ മാത്രമല്ല സിനിമയിലെ വനിതാ കൂട്ടായ്മയായ ഡബ്ല്യൂസിയേയും വെട്ടിലാക്കിയിരിക്കുന്ന അവസ്ഥയാണ് നിലവിലുള്ളത്.