“കൊടിക്കുന്നിലിന്‍റെ താല്‍പ്പര്യമല്ല കെപിസിസി പട്ടികയില്‍ നടപ്പാക്കേണ്ടത്” - തുറന്നടിച്ച് വിഷ്ണുനാഥ്

കൊടിക്കുന്നില്‍ സുരേഷ് എം പിക്കെതിരെ തുറന്നടിച്ച മറുപടിയുമായി പി സി വിഷ്ണുനാഥ്. കെ പി സി സി പട്ടിക വ്യക്തികളുടെ താല്‍പ്പര്യങ്ങള്‍ക്ക് അനുസരിച്ചല്ല തയ്യാറാക്കേണ്ടതെന്നാണ് വിഷ്ണുനാഥ് പറഞ്ഞിരിക്കുന്നത്.

കോണ്‍ഗ്രസ് പാര്‍ട്ടിയില്‍ വ്യക്തികളുടെ താല്‍പ്പര്യത്തിനല്ല സ്ഥാനം. പട്ടികയില്‍ തന്നെ ഉള്‍പ്പെടുത്തണമോ എന്നത് തീരുമാനിക്കാല്‍ ഉന്നതരായ നേതാക്കളുള്ള പാര്‍ട്ടിയാണിത്. ഞാന്‍ 24 വയസുമുതല്‍ കൊല്ലം എഴുകോണ്‍ ബ്ലോക്കില്‍ നിന്നുള്ള കെ പി സി സി അംഗമാണ് - വിഷ്ണുനാഥ് പറഞ്ഞു. 

വിഷ്ണുനാഥിനെ കെ പി സി സി പട്ടികയില്‍ നിന്ന് ഒഴിവാക്കണമെന്നും തന്‍റെ നോമിനിയായ വെളിയം ശ്രീകുമാറിനെ ഉള്‍പ്പെടുത്തണമെന്നുമായിരുന്നു കൊടിക്കുന്നില്‍ സുരേഷ് നേതൃത്വത്തോട് ആവശ്യപ്പെട്ടത്. രാഹുല്‍ ഗാന്ധിക്ക് നേരിട്ടാണ് സുരേഷ് പരാതി നല്‍കിയത്.

എന്നാല്‍ വിഷ്ണുനാഥ് നിലവില്‍ എ ഐ സി സി സെക്രട്ടറിയാണെന്നും അദ്ദേഹത്തെ കെ പി സി സി പട്ടികയില്‍ നിന്ന് ഒഴിവാക്കാനാകില്ലെന്നും മുന്‍ മുഖ്യമന്ത്രി ഉമ്മന്‍‌ചാണ്ടി നിലപാടെടുത്തതോടെ കൊടിക്കുന്നില്‍ സുരേഷിന്‍റെ നീക്കം പരാജയമാകുമെന്ന് ഏതാണ്ടുറപ്പാണ്.