സി.വി.രാമന്‍ പിള്ളയെ സ്മരിക്കുമ്പോള്‍

പീസിയന്‍

WD WD

മലയാള സാഹിത്യ ചരിത്രത്തില്‍ "മാര്‍ത്താണ്ഡവര്‍മ്മ', "ധര്‍മ്മരാജ' തുടങ്ങിയ കൃതികള്‍ക്ക് ഇതിഹാസതുല്യമായ സ്ഥാനമാണുള്ളത്. ഇവയുടെ കഥാകാരന്‍ സി.വി. രാമന്‍ പിള്ളയുടെ ചരിത്ര നോവലുകളുടെ രചനയിലൂടെ മലയാളത്തിന് നവ്യാനുഭവം പകര്‍ന്നുകൊടുത്തു.

1858 മെയ് 19ന് തിരുവനന്തപുരത്തു ജനിച്ച സി.വി. രാമന്‍ പിള്ള ബി.എ. ബിരുദം നേടിയ ശേഷം ഹൈക്കോടതിയില്‍ ഗുമസ്തനായി ജോലിയില്‍ പ്രവേശിച്ചു. പത്രപ്രവര്‍ത്തനത്തിനും പൊതുപ്രവര്‍ത്തനത്തിനും വ്യാപൃതനായ സി.വി. മലയാളത്തിലെ ആദ്യത്തെ ചരിത്രാഖ്യായികയായ മാര്‍ത്താണ്ഡവര്‍മ്മ 1891 ലാണ് പ്രസിദ്ധപ്പെടുത്തുന്നത്.

1905 ല്‍ ഗവണ്‍മെന്‍റ് പ്രസ് സൂപ്രണ്ടായി. ഉദ്യോഗത്തില്‍ നിന്നും 1912 ല്‍ വിരമിച്ച സി.വി. രാമന്‍ പിള്ള ഇംഗ്ളീഷിലും മലയാളത്തിലും പത്രപ്രവര്‍ത്തനവും ലേഖനമെഴുത്തും തൊഴിലാക്കി.വിദ്യാഭ്യാസ കാലത്തുതന്നെ ധാരാളം ഇംഗ്ളീഷ് നോവലുകള്‍ വായിച്ചിരുന്ന സി.വി. മലയാളത്തിലെ ആദ്യത്തെ ആഖ്യായിക-ചരിത്രനോവല്‍ ആയ മാര്‍ത്താണ്ഡവര്‍മ്മ 1890ല്‍ പ്രസിദ്ധപ്പെടുത്തി.

മാര്‍ത്താണ്ഡവര്‍മ്മയ്ക്കുശേഷം സി.വി. വിപുലമായ അനുഭവസമ്പത്തിനെ ആസ്പദമാക്കി രചിച്ച ആഖ്യായികകളാണ് ധര്‍മ്മരാജ (1913), രാമരാജബഹദൂര്‍ (1918) എന്നിവ. ഇരുപതോളം വര്‍ഷത്തിനിടയില്‍ സി.വി. രചിച്ചത് ചന്ദ്രമുഖീവിലാസം, കുറിപ്പില്ലാക്കളരി എന്നീ പ്രഹസനങ്ങള്‍ മാത്രമായിരുന്നു.

1905 ല്‍ ഗവണ്‍മെന്‍റ് പ്രസ് സൂപ്രണ്ടായി. സാമുദായിക സംഘടനാ പ്രവര്‍ത്തനങ്ങളിലും മലയാളി മെമ്മോറിയല്‍ മുതലായ രാഷ്ട്രീയ പ്രക്ഷോഭങ്ങളിലും പങ്കെടുത്തു. നിയമപഠനം ആരംഭിച്ചെങ്കിലും പൂര്‍ത്തിയാക്കിയില്ല. ഇടയ്ക്കു കുറേക്കാലം ചെന്നൈയില്‍ താമസിച്ചു. മൈസൂറും ഹൈദരാബാദും സന്ദര്‍ശിച്ചു.

അവിടങ്ങളില്‍നിന്ന് ധര്‍മ്മരാജാ, രാമരാജാബഹദൂര്‍ എന്നീ ആഖ്യായികള്‍ക്കുള്ള ചരിത്രവസ്തുതകള്‍ ശേഖരിച്ചും ഉദ്യോഗത്തില്‍നിന്നു വിരമിച്ചതിനുശേഷം പൊതു പ്രവര്‍ത്തനങ്ങളിലും സാഹിത്യരചനയിലും പൂര്‍ണമായി മുഴുകി. ഇംഗ്ളീഷിലും മലയാളത്തിലും പത്രപ്രവര്‍ത്തനവും ലേഖനമെഴുത്തും തൊഴിലാക്കി.

തിരുവിതാംകൂര്‍ ചരിത്രത്തിന്‍റെ പശ്ചാത്തലത്തില്‍ കല്പിത കഥാപാത്രങ്ങളെയും കല്പിത സംഭവങ്ങളെയും ഉള്‍ക്കൊള്ളിച്ചുകൊണ്ടുള്ളവയാണ് മൂന്ന് ആഖ്യായികകളും. വാള്‍ട്ടര്‍ സ്കോട്ടിന്‍റെ ഐവാന്‍ ഹോയെ മാതൃകയാക്കിയാണ് മാര്‍ത്താണ്ഡവര്‍മ്മ രചിച്ചിരിക്കുന്നത്. മാര്‍ത്താണ്ഡവര്‍മ്മ സംഭവപ്രധാനവും സരളവുമാണ്. യുവരാജവും എതിരാളികളും തമ്മിലുള്ള ഏറ്റുമുട്ടലാണ് അതിന്‍റെ പശ്ഛാത്തലം.

പില്‍ക്കാലത്തു രാജാവിന് എതിരായി നടന്ന ഗൂഢാലോചനയെയും മൈസൂര്‍ സുല്‍ത്താന്മാരുടെ ആക്രമണത്തെയും പശ്ഛാത്തലമാക്കി രചിച്ച ധര്‍മ്മരാജായും രാമരാജബഹദൂറും അനേകം കഥാതന്തുക്കള്‍ കൂടിച്ചേര്‍ന്ന സങ്കീര്‍ണേതിവൃത്തങ്ങള്‍ ചിത്രീകരിക്കുന്നു. അവയാണ് സി.വി.യുടെ മികച്ച കൃതികള്‍. അസാമാന്യ വ്യക്തിത്വമുള്ള കഥാപാത്രങ്ങളുടെ അവതരണമാണ് ഈ ആഖ്യായികയുടെ പ്രത്യേകത.

പ്രേമാമൃതം (1915) എന്ന സാമൂഹിക നോവലും കുറുപ്പില്ലാക്കളരി, പണ്ടത്തെ പാച്ചന്‍ തുടങ്ങി ഒമ്പത് പ്രഹസനങ്ങളും സി.വി. രചിച്ചു. 1922 മാര്‍ച്ച് 21നാണ് അന്തരിച്ചത്. സാഹിത്യലോകത്ത് ഒരു പ്രസ്ഥാനമായി വളര്‍ന്നു വന്ന ചരിത്രാഖ്യായികള്‍ അദ്ദേഹത്തിന്‍റെ മരണത്തോടെ അനാഥമായി.സി.വി.യുടെ സ്മരണ നിലനിര്‍ത്തുന്നതിനായി തിരുവനന്തപുരത്ത് സി.വി. രാമന്‍പിള്ള നാഷണല്‍ ഫൗണ്ടേഷന്‍ പ്രവര്‍ത്തിച്ചുവരുന്നു.

സി.വിയുടെ ഇളയപുത്രി മഹേശ്വരിയമ്മയെ വിവാഹം ചെയ്തത് ഇ.വി. കൃഷ്ണപിള്ളയാണ്. അദ്ദേഹത്തിന്‍റെ മകനാണ് പ്രശസ്ത ചലച്ചിത്ര നടന്‍ അടൂര്‍ഭാസി.