എനിക്കുമടുത്തു, എല്ലാം മതിയാക്കുന്നു: യേശുദാസ്

PRO

വാനപ്രസ്ഥത്തിനൊരുങ്ങുകയാണ് ഗാനഗന്ധര്‍വന്‍ കെ ജെ യേശുദാസ്. തനിക്ക് സംഗീതമല്ലാതെ മറ്റെല്ലാം മടുത്തെന്നും എല്ലാറ്റില്‍ നിന്നും ഒഴിഞ്ഞ് ജീവിതം മുന്നോട്ടുകൊണ്ടുപോകാന്‍ ആഗ്രഹിക്കുന്നുണ്ടെന്നും മലയാളികളുടെ പ്രിയപ്പെട്ട ദാസേട്ടന്‍ പറയുന്നു.

ഇപ്പോഴുള്ളതെല്ലാം വിട്ടെറിഞ്ഞ് ആരുടെയും ഒന്നിന്‍റെയും ശല്യമില്ലാത്ത ഒരു സ്ഥലത്തേക്ക് ഞാന്‍ പോയേക്കും. അതിന് ഭാര്യയും മക്കളുമൊക്കെ എതിര്‍ത്താന്‍ അവരോടും നമസ്കാരം പറയും. എല്ലാവര്‍ക്കും ഇതുസംബന്ധിച്ച് ഇപ്പൊഴേ ഒരു വിവരം തരികയാണ്. പെട്ടെന്ന് അത് സംഭവിക്കുമ്പോള്‍ ‘ദാസേട്ടന്‍ അങ്ങനെ ചെയ്തല്ലോ’ എന്ന് ആരും പറയാനിടവരരുത് - ഒരു അഭിമുഖത്തില്‍ യേശുദാസ് വ്യക്തമാക്കി.

എനിക്ക് ഇനി ഇതില്‍കൂടുതല്‍ ഒന്നും നേടാനില്ല. അതുകൊണ്ടുതന്നെ സംഗീതമല്ലാതെ മറ്റെല്ലാം മടുക്കുന്നു. ഞാന്‍ ആഗ്രഹിച്ച, അനുഭവിച്ച സംഗീതത്തിന്‍റെ കാലവും കഴിഞ്ഞു. ഇതൊരു ഒളിച്ചോട്ടമല്ല. ജീവിതത്തില്‍ ഒരു ഘട്ടമെത്തുമ്പോള്‍ ഭാര്യയും ഭര്‍ത്താവും വാനപ്രസ്ഥത്തിന്‌ പോകുന്ന പതിവ്‌ പുതിയതല്ല. ഭാര്യ വന്നില്ലെങ്കിലും ഭര്‍ത്താവിന്‌ പോകേണ്ടി വരും - യേശുദാസ് വ്യക്തമാക്കി.