എയര്‍ ഇന്ത്യ വിമാനത്തില്‍ ഒളിയാത്ര

ടിക്കറ്റോ മറ്റു യാത്രാരേഖകളോ ഇല്ലാതെ വിമാനത്തില്‍ യാത്രചെയ്യാന്‍ കഴിയുമോ? കഴിയുമെന്ന് എയര്‍ ഇന്ത്യയുടെ മെദീന-ജയ്‌പൂര്‍ വിമാനത്തില്‍ ഒളിച്ചു യാത്ര ചെയ്ത ഒരു തൂപ്പുകാരന്‍ തെളിയിച്ചു.

മെദീന വിമാനത്താവളത്തില്‍ എയര്‍ ഇന്ത്യയുടെ തൂപ്പുകാരനായി ജോലിനോക്കിയിരുന്ന ഹബിബ് ഹുസൈന്‍ എന്നയാളാണ് എയര്‍ ഇന്ത്യ വിമാനവുമായി ബന്ധപ്പെട്ട ഏറ്റവും പുതിയ സുരക്ഷാ ലംഘനം നടത്തിയത്. ശനിയാഴ്ച മെദീനയില്‍ നിന്ന് ജയ്പൂരിലേക്ക് വന്ന വിമാനത്തിന്റെ ടോയ്‌ലറ്റില്‍ ഒളിച്ചിരുന്ന ഇയാളെ വിമാനം പറന്നുയര്‍ന്ന ശേഷമാണ് അധികൃതര്‍ കണ്ടത്.

ജയ്പൂരില്‍ വിമാനം എത്തിയശേഷം മതിയായ യാത്രാ രേഖകളില്ലാതെ യാത്ര ചെയ്ത കുറ്റത്തിന് ഇയാളെ പൊലീസിന് കൈമാറി.

മദീനയില്‍ സഹപ്രവര്‍ത്തകരുമായി ഉണ്ടായ വഴക്കിനെ തുടര്‍ന്ന് നാട്ടിലേക്ക് തിരികെപ്പൊരാന്‍ തീരുമാനിച്ചതിനെ തുടര്‍ന്നാണ് വിമാനത്തില്‍ ഒളിച്ചു കടന്നത് എന്ന് ഹബീബ് ഹുസൈന്‍ വെളിപ്പെടുത്തുന്നു.