ലൈംഗികാരോപണം: രാജസ്ഥാന്‍ മന്ത്രി പുറത്ത്

ജോധ്പൂരില്‍ നഴ്സിനെ കാണാതായ സംഭവുമായി ബന്ധപ്പെട്ട് രാജസ്ഥാന്‍ ജലവിഭവ മന്ത്രി മഹിപാല്‍ മദേര്‍നയെ പുറത്താക്കി. മദേര്‍നയെ മന്ത്രിസഭയില്‍ നിന്ന് പുറത്താക്കാന്‍ മുഖ്യമന്ത്രി അശോക്‌ ഗെലോട്ട്‌ ഗവര്‍ണറോട് ശുപാര്‍ശ ചെയ്യുകയായിരുന്നു.

ഭന്‍വാഡി ദേവിയെന്ന നഴ്സിന്റെ തിരോധാനത്തെക്കുറിച്ചുള്ള ആരോപണങ്ങളാണ് മദേര്‍നയെ പുറത്താക്കുന്നതില്‍ കലാശിച്ചത്. ഇവരെ മദേര്‍ന ബലാത്സംഗം ചെയ്തു കൊന്നു എന്ന ആരോപണം ശക്തിപ്പെടുകയാണ്. മദേര്‍നയും നഴ്സും അടുത്ത ബന്ധം പുലര്‍ത്തിയിരുന്നു. മദേര്‍നയും നഴ്സും മറ്റൊരു എം എല്‍ എയും ഉള്‍പ്പെടുന്ന ചില രംഗങ്ങളുള്ള ഒരു സി ഡി നഴ്സ് പരസ്യപ്പെടുത്തിയിരുന്നു. ഇത് ഉപയോഗിച്ച് ഇവര്‍ മദേര്‍നയെ ഭീഷണിപ്പെടുത്തിയിരുന്നു എന്നും റിപ്പോര്‍ട്ടുകളുണ്ട്.

തുടര്‍ന്ന് സെപ്റ്റംബര്‍ ഒന്ന് മുതല്‍ നഴ്സിനെ കാണാതാവുകയായിരുന്നു. അന്വേഷണത്തില്‍ യാതൊരു പുരോഗതിയും ഇല്ലാത്തതിനാല്‍ സെപ്തംബര്‍ 14-ന് കേസ് സി ബി ഐക്ക് കൈമാറി. സംഭവത്തിന് പിന്നില്‍ രാഷ്ട്രീയ ഗൂഢാലോചയയുണ്ടെന്ന് വ്യക്തമാക്കുന്ന ഒരു ഊമക്കത്ത് ഈയിടെ അന്വേഷണസംഘത്തിന് ലഭിക്കുകയും ചെയ്തു.

കേസില്‍ സംസ്ഥാന സര്‍ക്കാരിനെ ഹൈക്കോടതി രൂക്ഷമായ ഭാഷയില്‍ വിമര്‍ശിച്ചിരുന്നു. തുടര്‍ന്നാണ് മദേര്‍നയുടെ രാജി ആവശ്യപ്പെടാന്‍ മുഖ്യമന്ത്രി നിര്‍ബന്ധിതനായത്.