കര്‍ണാടകയിലെ കോലാര്‍ സ്വദേശിനിയായ യുവതിക്ക് ലോകത്ത് ആര്‍ക്കുമില്ലാത്ത രക്ത ഗ്രൂപ്പ്!

കോലാറിലെ ഒരു ആശുപത്രിയില്‍ ഹൃദയ ശസ്ത്രക്രിയയ്ക്കായി 38 വയസ്സുള്ള ഒരു സ്ത്രീയെ പ്രവേശിപ്പിച്ചപ്പോഴാണ് ഈ ശ്രദ്ധേയമായ കേസ് വെളിച്ചത്തുവന്നത്.

blood

കര്‍ണാടകയിലെ കോലാര്‍ ജില്ലയില്‍ നിന്നുള്ള സ്ത്രീയില്‍ ലോകത്ത് മറ്റൊരിടത്തും കണ്ടെത്തിയിട്ടില്ലാത്ത ഒരു പുതിയ രക്തഗ്രൂപ്പ് കണ്ടെത്തി. കോലാറിലെ ഒരു ആശുപത്രിയില്‍ ഹൃദയ ശസ്ത്രക്രിയയ്ക്കായി 38 വയസ്സുള്ള ഒരു സ്ത്രീയെ പ്രവേശിപ്പിച്ചപ്പോഴാണ് ഈ ശ്രദ്ധേയമായ കേസ് വെളിച്ചത്തുവന്നത്.

അവരുടെ രക്തഗ്രൂപ്പ് O Rh+ ആയിരുന്നു. ഏറ്റവും സാധാരണമായ രക്തഗ്രൂപ്പ്. എന്നിരുന്നാലും, ലഭ്യമായ  O പോസിറ്റീവ് രക്ത യൂണിറ്റുകളൊന്നും അവരുമായി പൊരുത്തപ്പെടുന്നില്ല. കൂടുതല്‍ അന്വേഷണത്തിനായി ആശുപത്രി റോട്ടറി ബാംഗ്ലൂര്‍ ടിടികെ ബ്ലഡ് സെന്ററിലെ അഡ്വാന്‍സ്ഡ് ഇമ്മ്യൂണോഹെമറ്റോളജി റഫറന്‍സ് ലബോറട്ടറിയിലേക്ക് കൈമാറി.

നൂതനമായ സീറോളജിക്കല്‍ സാങ്കേതിക വിദ്യകള്‍ ഉപയോഗിച്ച്, അവരുടെ രക്തം 'പാന്റിയാക്ടീവ്' ആണെന്നും എല്ലാ പരിശോധനാ സാമ്പിളുകളുമായും പൊരുത്തപ്പെടുന്നില്ലെന്നും ഞങ്ങളുടെ സംഘം കണ്ടെത്തിയതായി റോട്ടറി ബാംഗ്ലൂര്‍ ടിടികെ ബ്ലഡ് സെന്ററിലെ ഡോ. അങ്കിത് മാത്തൂര്‍ പറഞ്ഞു. അപൂര്‍വമോ അജ്ഞാതമോ ആയ ഒരു രക്തഗ്രൂപ്പിന്റെ സാധ്യതയുള്ള കേസായി ഇത് തിരിച്ചറിഞ്ഞ മെഡിക്കല്‍ സംഘം, അനുയോജ്യമായ ഒരു പൊരുത്തം കണ്ടെത്താന്‍ അവരുടെ കുടുംബാംഗങ്ങളില്‍ 20 പേരുടെ രക്തസാമ്പിളുകള്‍ ശേഖരിച്ചു.

പക്ഷേ അവയൊന്നും പൊരുത്തപ്പെടുന്നില്ല. എന്നിരുന്നാലും കൂടുതല്‍ രക്തത്തിന്റെ ആവശ്യമില്ലാതെ അവരുടെ ശസ്ത്രക്രിയ വിജയകരമായി പൂര്‍ത്തിയാക്കിയതായി ഡോക്ടര്‍ അറിയിച്ചു. CRIB ആന്റിജന്‍ ഉള്ള ലോകത്തിലെ ആദ്യത്തെ വ്യക്തിയായി ഈ സ്ത്രീയെ അടയാളപ്പെടുത്തിയെന്ന് ഡോ. മാത്തൂര്‍ പറഞ്ഞു. 2025 ജൂണില്‍ ഇറ്റലിയിലെ മിലാനില്‍ നടന്ന ഇന്റര്‍നാഷണല്‍ സൊസൈറ്റി ഓഫ് ബ്ലഡ് ട്രാന്‍സ്ഫ്യൂഷന്‍ (ISBT) യുടെ 35-ാമത് റീജിയണല്‍ കോണ്‍ഗ്രസിലാണ് ഈ ചരിത്രപരമായ പ്രഖ്യാപനം നടത്തിയത്.